Zgjedhjet e 30 qershorit, përfundon afati i regjistrimit në KQZ

Afati i regjistrimit të kandidatëve për zgjedhjet e 30 qershorit ka përfunduar mesnatën e së hënës. Për shkak të protestës së opozitës, regjistrimet u bënë në Lundër, në mjediset ku administrohen materialet zgjedhore. Përveç Partisë Socialiste dhe disa partive të tjera të pavarura, për zgjedhjet e 30 qershorit është regjistruar edhe Bindja Demokratike. Kjo forcë do të garojë me 25 kandidatë.

 Ka përfunduar mesnatën e së hënës afati i regjistrimit të kandidatëve për zgjedhjet lokale të 30 qershorit.

Për të shmangur ndonjë incident të mundshëm me protestuesit e opozitës gjatë marshimit ditën e hënë, Komisioni Qendror i Zgjedhjeve zhvendosi protokollin në ambientet ku mbahen materialet zgjedhore në Lundër.

Bledar Skënderi: Duke menduar që itinerari i protestuesve kalonte dhe pranë institucionit tonë u treguam të kujdesshëm që të mos kishte përplasje. Me konsensus vendosëm që procesin ta vazhdonim këtu në ambjentet e magazinave në Lundër.

Përveç Partisë Socialiste dhe disa partive të tjera të pavarura, për zgjedhjet e 30 qershorit është regjistruar edhe Bindja Demokratike. Kjo forcë do të garojë me 25 kandidatë.

Sa i përket kandidatëve për këshilltarë në Bashkinë Tiranë, Erion Veliaj, ka përzgjedhur 88 kandidatë për të garuar për 61 vende.

Lista e PS për qarkun e Tiranës kryesohet nga zv/ministrja e Shëndetësisë, Bardhylka Kospiri dhe 6 zëvendësministra të tjerë ndodhen në zonën e sigurt.

Hyrje e re në listën e socialistëve është Adrian Civici.

Në emrat që Erion Veliaj ka zgjedhur t’i ketë në 10-të të parët vihet re aktori i humorit Gazmend Paja dhe ish-futbollisti Redi Jupi.