“Zhdukeni nga sytë e Trumpit”, udhëzimi i Shtëpisë së Bardhë për luftanijen “USS John McCain”

Shtëpia e Bardhë bëri gjithçka të mundshme që luftanija amerikane, e pagëzuar me emrin e “armikut” të tij të betuar republikan, senatorit të ndjerë John McCain, të mos i dilte përpara syve gjatë vizitës së tij në një bazë detare në Japoni gjatë kësaj jave.

Duke cituar një “e-mail” që daton më 15 maj, dërguar nga një zyrtar i Komandës amerikane të Indo-Paqësorit drejt zyrtarëve amerikanë të Forcave Ajrore dhe Detare, “Wall Street Journal” shkruan se “USS John McCain” duhej “të zhdukej nga çdo fushëpamje” gjatë vizitës së Trumpit në Ditën e Përkujtimit në bazën “Yokosuka”, teksa e marta shënonte ditën e fundit të vizitës shtetërore të tij në Japoni.

“E-mail”-i u kërkonte zyrtarëve “të konfirmonin” se direktiva “do të përmbushej”.

Në kohën kur një komandant i Marinës shprehu habinë për këtë instruksion, zyrtari i kundërpërgjigjej se edhe ai vet “e dëgjonte për herë të parë një udhëzim të tillë”, sipas asaj që publikon gazeta prestigjioze amerikane bazuar mbi këmbimet elektronike.

Zyrtari kishte thënë më tej se do të bisedonte me Shtëpinë e Bardhë për të marrë më shumë informacione mbi udhëzimin e çuditshëm, raporton “WSJ”.

“E-mail”-i fillestar detajonte planet për mbërritjen e Trumpit në bazën që gjendet në jug të Tokios, përfshi instruksionet për zonat e uljes për helikopterët, si dhe përgatitjet në “USS Wasp” (një luftanije shumëfunksionale amfibe) ku presidenti do t’iu adresohej marinarëve amerikanë.

“Wall Street Journal” publikoi edhe një foto që tregonte se një pëlhurë e madhe ishte vendosur mbi emrin e McCainit përpara mbërritjes së Trumpit në Japoni të shtunën e javës së kaluar, duke shtuar se marinarët ishin udhëzuar më tej të hiqnin çdo mbulesë nga anija që mbante këtë emër.