Astrit Avdyli, i “urti” i Shijakut

Reldar Dedaj

“Rroftë Dako, rroftë PS, aty i qaj hallet.” Kjo është fraza e lëshuar para trupit gjykues dhe gazetarëve të pranishëm në sallën e gjyqit nga Astrit Avdyli, i arrestuar në kuadër të operacionit “Volvo 4” dhe i cilësuar si koka e bandës së Avdylajve të Shijakut. Me sa dukej, ai, prej disa kohësh e kishte kuptuar se politika është shndërruar si besimi në shekujt e parë të lindjes së krishterimit: punëdhënia kryesore e çdo krijese. Për të, nëse nuk je në parti, nuk mund të rrosh, nuk mund të fitosh mjetet e jetesës, nuk mund të punosh aty ku fitohet pak dhe punohet më pak. Sipas tij, po të mos jesh i partisë nuk mund të dhunosh tjetrin dhe as mund të dalësh i larë prej krimit tënd… Po të mos jesh në parti, nuk je në kryqëzatë! Kjo psikozë është krijuar. E kanë sajuar fillimisht liderët, pastaj e kanë bërë për vete kriminelët dhe të paaftët.

Ujku i Stepës

Shkrimtari dhe eseisti i madh gjerman, Hermann Hesse, ka thënë se si Ujku i Stepës ka edhe shumë njerëz, nga ata që kanë lindur njerëz. Dikush ndien urinë që të qeverisë të tjerët, por pa asnjë pikë dashurie për njeriun. Dhe, sipas shkrimtarit, Ujku i Stepës pakënaqësinë me veten e kishte fituar për një arsye tjetër: në shpirt e ndiente se nuk ishte njeri, por ujk. Dëshira që të kishte lindur njeri e mundonte. Njësoj është përderisa pakënaqësinë ndaj vetes e shpreh në mënyrë ujqërore ndaj të tjerëve. Hermann Hesse do t’i konsideronte edhe shumë njerëz të tjerë një Ujk të Stepës, edhe pse kanë lindur në Shijak, Lezhë, Shkodër apo Tiranë, bie fjala.

Nëse ke dëgjuar përgjimet e publikuara nga gazeta gjermane “Bild”, e kupton mjaft mirë se edhe Ujku i Stepës si kudo tjetër së bashku me botën e tij të errët është edhe në Shqipëri. Të pesta fragmentet e atyre bisedave, që i përkasin dosjes së famshme “339/1”, tregojnë shumë më tepër sesa thjesht vjedhjen e zgjedhjeve nga njeriu ujk në bashkëpunim me Partinë Socialiste.

Aty rrëfehet se si Astrit Avdyli komandon të gjithë piramidën shtetërore, duke nisur nga drejtorët e ujësjellësit dhe hipotekave e deri tek ata të bashkive në Durrës dhe Shijak. Aty kuptojmë se ky “kapo” kalon nëpër duart e tij të gjithë punonjësit e ujësjellësit për të detektuar ndonjë PD-ist që mbahet ende me rrogë dhe për t’i treguar qejfin me mënyra aspak xhentile nëse nuk e kthen votën. Aty mësojmë se banditët e dinë më para publikut, madje edhe vetë socialistëve, listën e deputetëve të qarkut dhe se ata kanë aty njerëzit e tyre.

Fatkeqësisht, jo vetëm kaq. Aty vëmë re se lidhja e Astrit Avdylit me kryebashkiakun Dako nuk është thjesht një indicie, ashtu sikurse përpiqet prej kohësh të fshihet Edi Rama, por një marrëdhënie e fortë e ngjizur mes njeriut ujk dhe partisë. Aty vërtetojmë se ata janë direkt të lidhur me interesat e kryeministrit, të cilit ia dinë të gjithë axhendën e udhëtimeve jashtë dhe ndaj të cilit zotohen se do ta surprizojnë, duke i dhuruar një rezultat elektoral dhjetë me zero.

Kush është Astrit Avdyli

Astrit Avdyli, 45 vjeç, ishte në listën e njerëzve më të kërkuar nga drejtësia shqiptare në vitin 2013, pasi rezultonte si i dënuar me 12 vite burg për vrasje. Me origjinë çame, i rritur jetim dhe pa baba, Astrit Avdyli njihet si i “Urti”, pasi në dallim nga të tjerët e grupit, Astriti i zgjidhte punët pa dhunë. Grupi i Shijakut njihet si një grup i përbërë me njerëz të dhunshëm.

Babai i tre fëmijëve u përfshi që në vitet ’90 në trafikun e drogës dhe kokainës. Me kalimin e viteve, ai u bë edhe më i fuqishëm, me lidhje të forta, që siç mësohet sot, shkojnë deri te kupola e shtetit shqiptar. Vëllezërit Avdyli, Shkëlqim, Jasin, Astrit dhe Altin akuzohen për vrasje, prostitucion, trafik droge dhe disa vepra të tjera penale.

Gjithçka filloi të dalë në sipërfaqe në vitin 1996, ishte koha kur u vra me armë zjarri Dritan Avdyli, kushëriri i parë i Astrit Avdylit, kokës së bandës. Ky i fundit, i dënuar më parë për prostitucion në Itali, merr hak duke vrarë në qendër të Shijakut personin që nxori në pritë Dritanin. Ndërkohë që spiralja e hakmarrjes nuk u ndal me kaq, duke vazhduar me ngjarje të tjera të familjes Avdyli.

Operacioni i 21 tetorit, “Volvo 4”

Policia e Shtetit goditi familjen kriminale Avdyli në Shijak, duke arrestuar tre vëllezërit, kushëririn e parë të tyre dhe mbi 20 anëtarë të bandës që akuzohet për trafik heroine në Shqipëri dhe në Gjermani, ndërsa numëron dhjetëra biznese, mes tyre hoteli luksoz në Durrës “Germany”.

Të arrestuar ishin vëllezërit: Astrit Avdyli, që është koka e bandës, Flamur Avdyli (që u lirua më vonë) dhe Shkëlqim Avdyli. Ndërsa përpos tyre u prangos kushëriri i parë, Jasim Avdyli, së bashku me H. Hoxha, të dënuar në Turqi për trafik heroine dhe mbi 20 persona të tjerë. Familja Avdyli është pronare e dhjetëra bizneseve në Shijak, Durrës dhe disa qytete të tjera të vendit, mes tyre kompania “Orges Albania 2016” dhe hoteli luksoz “Germany” në Durrës.

Dalja para kohe nga burgu

Përpara se të shfaqte interes për kryebashkiakun Dako dhe procesin zgjedhor në Qarkun e Durrësit, Astrit Avdyli, 45-vjeçari nga Shijaku që akuzohet nga Prokuroria e Krimeve të Rënda si kreu i grupit të organizuar në trafikun e drogës, kishte probleme të tjera.

I dënuar me 16 vite burg për një vrasje të ndodhur në vitin 1997, Avdyli ndërmori një betejë ligjore 10-vjeçare për lirim të parakohshëm nga Burgu i Shënkollit-dhe në fund e fitoi. Dokumentet gjyqësore tregojnë se Astrit Avdyli u lirua pas 13 vitesh burg, pasi siguroi më parë një raport mjekësor që e diagnostikonte atë me “depresion endogjen me tentativa vetëvrasëse”. Ai doli nga burgu më 2 mars 2016, pasi Gjykata e Lartë urdhëroi lirimin e tij me argumentin se “qëndrimi në burg i rrezikonte jetën”.

Pagesa e frikës

Të gjithë po i paguajmë dhe po na paguajnë për frikën. Frika vjen ngadalë, ndërsa pagesa po bëhet dora-dorës, ditë për ditë. Po bëjmë të gjithë sikur nuk po shikojmë gjë… Mjafton vetëm kapja në përgjime e Vangjush Dakos me Astrit Avdylin për të kuptuar se në zgjedhjet e 2017-s në Durrës, PS-ja as nuk ka garuar dhe as nuk ka fituar, por ka qenë kapo i një bande të strukturuar trafikantësh droge, që ka kapur shtetin, sipas shprehjes së preferuar të Edi Ramës: “Vjedhin votat për të vjedhur Shqipërinë dhe vjedhin Shqipërinë për të vjedhur votat”.

Pastaj frika bëhet akoma edhe më e thellë: Këta do të kenë blerë Parlamentin ku bëhen ligjet; pastaj ligjet që bëhen aty mbulojnë paligjshmërinë e tyre. Pastaj do të jetë shitur gjykata, policia, spitali, zjarrfikësja, doganat, tatimet dhe burgu… Do të kenë mbetur pa shitur vetëm të pashitshmet, që nuk i duhen askujt./ Gazeta Liberal