Gjendje alarmante nga i nxehti ekstrem

Pasojat e të nxehtit ekstrem që ka përfshirë Evropën gjatë kësaj jave po fillojnë të ndjehen. Një zjarr i fuqishëm ka shkatërruar më shumë se 5000 hektarë pyje në Katalojnë të Spanjës. Rreth 350 zjarrfikës, si dhe 120 ushtarë janë përpjekur të shuajnë flakët në afërsi të qytetit La Torre del Espaniol.

Sipas autoriteteve, si pasojë e të nxehtit flakët mund të përhapen deri në 20 mijë hektarë të tjerë pyje. Shumë njerëz janë evakuuar dhe 5 autostrada janë mbyllur. 11 provinca në lindje dhe qendër të Spanjës po përjetojnë temperaturat më të larta gjatë 20 viteve të fundit.


Gjithashtu Franca, Italia, Gjermania, Çekia dhe Zvicra janë përfshirë nga temperatura ekstreme deri në 40 gradë.

Autoritetet po zbatojnë planin e emergjencës, duke hapur për kalimtarët hapësira me ajër të kondicionuar brenda ndërtesave publike. Gjithashtu spitalet si dhe zjarrfikëset do të jenë 24 orë në gatishmëri.