Meta për përgjimet: Personat përgjegjës të ndëshkohen

Presidenti i Shqipërisë, Ilir Meta, ka zhvilluar një vizitë në Berlin, ku është takuar me zyrtarë të rëndësishëm në parlamentin gjerman.

Gjatë një interviste për DW, Meta është pyetur në lidhje me përgjimet e publikuara nga “Bild”, ku përfshihen zyrtarë të PS dhe Astrit Avdylaj.

Meta është shprehur se të gjithë personat të cilët kanë ndërhyrë në procesin e zgjedhjeve duhet të ndëshkohen nga drejtësia.

Deutsche Welle: Dy ditë para se të vinit ju në Berlin, gazeta bulevardeske më e madhe në Gjermani, „Bild“, botoi protokollet e përgjimit nga prokuroria, që kanë shkaktuar edhe një breshëri reagimesh në median shqiptare dhe politikën shqiptare, gjithashtu. Fjalëkyçi i të gjithë këtyre artikujve është korrupsioni, për të cilin edhe opozita akuzon dhe lufton në protestat e saj.A ishte edhe kjo një temë në bisedat që keni pasur në Berlin?

Ilir Meta: Kjo nuk ka qenë aspak një temë në bisedat e mia, për sa i takon çfarë është pasqyruar në media të caktuara në Gjermani. Por natyrisht ka qenë temë angazhimi i vendosur për të përmbushur të gjitha pritmëritë në fushën e sundimit të ligjit, dhe së dyti rëndësia e jashtëzakonshme që kanë standardet demokratike të zgjedhjeve në Shqipëri, dhe kuptohet edhe ndëshkimi i gjithë personave përgjegjës apo të dyshuar për cënimin e integritetit të zgjedhjeve në të kaluarën.Këto kanë qenë mesazhe edhe të mëparshme të dhëna në mënyrë të vazhdueshme nga përfaqësues të grupeve të caktuara në Bundestag.