Rama paralajmëron sërish: Kush pengon zgjedhjet, nuk shkel në SHBA

Kryeministri Edi Rama ka publikuar një letër të shtatë, por siç thotë edhe vetë, ai nuk i drejtohet kreut demokrat Lulzim Bashës. Këtë herë ai u drejtohet “bashkëqytetarëve demokratë”, ndërkohë që i njofton se Partia Socialiste sot nis zyrtarisht fushatën e zgjedhjeve të 30 qershorit.

Por përveç kësaj ai u bën thirrje që të mos i pengojnë zgjedhjet pasi do të dënohen  për krime zgjedhore dhe përveç kësaj kreu i qeverisë thotë sërish se “nuk do ta kishte më të mundur të shkelte për gjithë jetën në Shtetet e Bashkuara (do të merrte në qafë edhe familjarët e afërt sipas ligjit përkatës në SHBA) dhe as do të kalonte dot më, kontrollin e kufijve të Bashkimit Europian duke u përfshirë në listën e kompjuterizuar të personave me rekorde kriminale, të cilët nuk hyjnë dot në territorin e Unionit.”

“Edhe dy fjalë për moslejimin e zgjedhjeve. Eshtë krim dhe ndëshkohet rëndë nga Kodi Penal i Republikës së Shqipërisë, kushdo që e kryen një krim të tillë.

Po jo vetëm kaq, cilido që do të kuturisej të prekte një hallkë të vetme të procesit zgjedhor dhe do të dënohej më pas për krime zgjedhore në Shqipëri, nuk do ta kishte më të mundur të shkelte për gjithë jetën në Shtetet e Bashkuara (do të merrte në qafë edhe familjarët e afërt sipas ligjit përkatës në SHBA) dhe as do të kalonte dot më, kontrollin e kufijve të Bashkimit Europian duke u përfshirë në listën e kompjuterizuar të personave me rekorde kriminale, të cilët nuk hyjnë dot në territorin e Unionit.

A i’a vlejnë të gjitha këto pasoja të rënda për të shkuar pas berihait? Nuk besoj dhe jam i bindur se nuk do të ketë njerëz të zakonshëm, që të bëhen pjesë e një marrëzie kaq të jashtëzakonshme”, shkruan Rama në letrën e shtatë publike.