SHBA. Trump shenjestron planetin Mars si hapin e ardhshëm gjigand për të zotëruar hapësirën

Në mesazhin e tij në Twitter, presidenti amerikan, me rastin e 50 vjetorit të uljes në Hënë, paralajmëron se “shenjestra” e ardhshme do të jetë planeti Mars.

“Administrata ime është e angazhuar për të rivendosur mbizotërimin dhe lidershipin e kombit tonë në hapësirë në shekujt e ardhshëm. Unë kam urdhëruar NASA-n që të dërgojë sërish në Hënë një burrë e një grua astronaute, të cilët do ti paraprijnë realizimit të hapit e ardhshëm gjigand, planetin Mars”

Këtë javë, Enti Amerikan i Hapësirës së Lartë, NASA shënoi 50-vjetorin e zbritjes historike në Hënë të anijes së hapësirës “Apollo 11”, me një seri ekspozitash dhe programesh të ndryshme anë e mbanë Shteteve të Bashkuara, duke filluar nga 16 -20 Korrik.

Ishte pikërisht 16 Korriku i vitit 1969, kur astronautët amerikanë, Neil Armstrong, Buzz Aldrin dhe Michael Collins filluan udhëtimin e tyre historik për në Henë nga Qendra e Hapësirës së Lartë të NASA-s, Kennedy, në shtetin Florida.
Katër ditë më vonë, me 20 Korrik, ndërkohë që astronauti Collins drejtonte në orbitin e Hënës anijen Apollo 11, dy kolegët e tij, astronautët Armstrong dhe Aldrin zbritën në sipërfaqen e Henës me një pjesë të vogël modulare të anijes së hapësirës së lartë të mbiemëruar, Shqiponja (“Eagle”), duke i deklaruar Amerikës dhe botës së, “Shqiponja kishte zbritur” në sipërfaqën e Henës. Ajo ishte hera e parë në historinë e njerëzimit që këmba e njeriut shkelte mbi sipërfaqen e Henës.
Neil Armstrong, i pari përfaqësues i njerëzimit që hodhi hapin e parë mbi Hënë, kishte deklaruar se misjoni i tyre eskplorues në hapësirë, ndonëse mund të ishte, “Një hap i vogël për njeriun”, për nga rëndësia historike, shkencore dhe teknologjike, ai ishte i vetdijshëm se suksesi i tyre përbënte edhe një “Hap gjigant për mbarë Njerëzimin”.