Trafik në çdo aks, fluks drejt plazheve

Jemi në kulmin e sezonit turistik dhe të shumtë janë njerëzit që këtë periudhë zgjedhin të udhëtojnë drejt plazheve apo edhe zonave të freskëta malore. E për këtë arsye qarkullimi në akset kryesore të vendit është rritur ndjeshëm dhe fundjava nisi me trafik të rënduar.

Fluksi i madh i pushuesve drejt plazheve të jugut ka bërë që rrugët nga Fieri në Vlorë të jenë të ngarkuara. Trafiku ka nisur që në orët e para të mëngjesit. Më e rënduar është situata në Vlorë pasi mijëra automjete kanë udhëtuar drejt bregdetit të Jonit. Trafik të rënduar ka patur edhe në drejtim te Durrësit, sikurse edhe nga Fushë-Kruja në Lezhë dhe në drejtim të Shkodrës.

Në Thumanë ka një radhë të gjatë të makinave. Ky aks është gjithnjë problematik sa i përket trafikut, sidomos gjatë sezonit të verës. E njëjta situatë paraqitet edhe në rrethrrotullimin e Durrësit, ku është një trafik shumë të rënduar.