“Do pastroj administratën nga buburrecat e shushunjat”, paralajmërimi i Ramës. Mesazh, të zgjedhurve të tij që…

Kryeministri Rama tha dje se po punon për të pastruar administratën nga buburrecat që po gërryejnë çdo gjë.

Në një takim me qytetarët, të cilët kanë gjetur zgjidhje të problematikave të tyre përmes platformës së bashkëqeverisjes, kreu i qeverisë mori kritika nga një qytetar nga Shkodra të cilin zyra e kadastrës në Shkodër i kishte vonuar shërbimin.

“Te shtëpia që jetoj në Shkodër, në oborr, kam pasur një trung ahu ku unë ulesha. Kam vënë re se kalojnë shumë buburreca poshtë edhe dilnin. Për kuriozitet e përmbysa, vura re se buburrecat kishin gërryer nga poshtë. Kështu që them sado i fortë të jetë trungu, nëse buburrecat nuk do të zhduken në një formë apo në një tjetër, ky trung do të mbetet përsëri i gërryer. Kështu që uroj që këto lloj buburrecash ose shushunjash të jenë sa më të pakta, edhe të mund të shtypen”, tha Rruzhdi Bërdica, një qytetar nga Shkodra. Në përgjigje të tij, Kryeministri vijoi me epitetin e buburrecave për punonjësit e papërgjegjshëm në administratë.

“Të jesh i sigurt që unë s’kam pasur nevojë të ulem në një stol për të parë se çfarë po më bëjnë buburrecat nga poshtë se rri në këmbë dhe i shoh buburrecat ulur që gërryejnë, por megjithatë kjo kërkon durim të madh, kërkon vullnet, kohë dhe sigurisht sisteme. Dhe platforma është një nga ato sisteme që i mpin buburrecat dhe disa prej tyre edhe i shtyp. Unë e di që ju keni parasysh buburrecat e Hipotekës së Shkodrës, kushedi ç’keni hequr me ta. Ne po vazhdojmë të luftojmë dhe kemi preferuar atë porosinë e Nënë Terezës, në vend se të mallkojmë errësirën, të ndezim një qiri çdo ditë derisa të bëhet dritë”, tha Kryeministri Rama.

Dy javë më parë, në përpjekje për të pastruar administratën publike në Shkodër, kreu i qeverisë u kërkoi en bloc të gjithë drejtorëve të jepnin dorëheqjen, gjë që nisi të bëhej menjëherë. Ky veprim erdhi si veprim reaksioni pas rezultatit të ulët në pjesëmarrje të qytetarëve të Shkodrës në zgjedhjet e 30 qershorit. Por kritikat e Kryeministrit dje ishin dhe për të zgjedhurit e tij në të gjitha nivelet, që qëndrojnë larg shqetësimeve të qytetarëve.

“Mijëra letra në muaj nga qytetarët. Letrat mbeteshin rrugët dhe qytetarët nuk merrnin përgjigje. Kryeministria i delegonte te ministritë. Ministritë i harronin në sirtarë dhe qytetari mbetej pa përgjigje. Sot nuk ka qytetar të shkruajë dhe të mos marrë përgjigje, jo natyrisht gjithmonë pozitive se ka raste kur kërkesa është e padrejtë”, tha Rama. Sipas tij, kjo platformë duhet të shërbejë edhe për deputetët, kryetarët e bashkive dhe drejtorët në përgjithësi, të cilët sipas tij nuk kanë vepruar deri më tani për të ndihmuar qytetarët.

“E njëjta gjë ndodh edhe me zyrën time në “Whatsapp”, gjithkush që ka mundësi të veprojë për të ndihmuar duhet ta bëjë këtë gjë, deputetët, kryetarët e bashkive, drejtorët, shumica nuk e bëjnë. Por ajo që po ndodh edhe në rastin e deputetëve është që kanë filluar intensivisht të shfrytëzojnë platformën, duke e shfrytëzuar dhe është platforma që lidh qytetarin me institucionin”, tha kreu i qeverisë.

Leave a Reply

Your email address will not be published. Required fields are marked *