Çfarë është Opozita dhe Opozitarizmi?

Nga Alban Daci

Dëgjova dhe lexova sot deklaratën e Bashës, i cili i bënte kërkesë Ramës për largimin e madje duke i ofruar si shembullin edhe kryeministrin e Maqedonisë së Veriut, Zaev.

Kërkesa e Bashës mu duk si kërkesa e një zyrtari të BE, i cili i përgjërohet Ramës për tu rikthyer në normalitet dhe për të mundësuar ri integrimin e Shqipërisë. Këtë lloj kërkese Edi Ramës s’mund t’ia bëj Basha, i cili në kushtet e një pushteti absolutë ka kohë që nuk dëgjon asnjë thirrje nga Opozita.

Rama e theksoj disa herë se pas refuzimit të hapjes se negociatave nga Franca, dielli do të lindte përsëri. Madje, kjo lloj fraze më duket me krahasimin “re sole” “mbreti diell”. Pra, për ata që lexojnë dhe e kuptojnë politikën, Rama e shpalli vetën një mbret që asgjë nuk e largon nga pushteti. Madje, ai nga të gjitha intervistat e tij thekson se jeta e tij politike do të vazhdoj pa pushim dhe pa pasur një datë konkrete largimi, as pas 2021.

Ndjenja e servilizmit, poshtërimit përballë një lideri qoftë në pushtet apo në Opozitë e ka dëmtuar mendimin e lirë e për pasojë ka vrarë çdo mundësi reale për korrigjime apo për propozime të dobishme në lidhje me proceset më të rëndësishme.

Basha duhet kritikuar kur gabon e duhet këshilluar që të mos gaboj më. Nëse i themi që ai ka gjithmonë të drejtë, atëherë ne, me servilizmin tonë dhe poshtërimin tonë po i japim mundësi Bashës të bëhet një Ram i dytë. Nuk ka demokraci nëse jetojmë me frikën për të thënë të vërtetën dhe mbi të gjitha nëse nuk kemi kurajë të mos e mbrojmë të vërtetën. E vërteta qëndron mbi çdo formë pushteti dhe ju shërbejnë të gjithë në formë universale që fare mirë mund të konsiderohet “sovrani i takon populli mbi parimin e të vërtetës dhe jo të servilizmit dhe nënshtrimit”.

Çfarë është Opozita?

Opozita nuk është mjeti dhe forma për të rimarrin pushtetin katër persona. Opozita është që pushtetin ta marrin qytetarët dhe ata të delegojnë përmes votës së lirë dhe zgjedhjeve të lirë pikërisht pushtetin tek përfaqësuesit parlamentar dhe tek një qeveri me përfaqësimin e të gjithë të shtresave sociale, intelektuale, politike dhe qytetare.

Çfarë është Opozita?

Opozita dhe opozitarizmi janë frymëzim. Nuk mund të kërkoj pushtetin asnjë lider opozitar që nuk frymëzon shumicën e qytetarëve. Nuk frikësohet asnjë lider pozitar nëse ka përballë një lider opozitar që nuk frymëzon shumicën e qytetarëve për ndryshim dhe për përmbysje të madhe. Nuk e frymëzojnë shumicën e qytetarëve pesë politikanë, tre prej të cilëve kanë më shumë se 20 vjet në pushtet sa majtas e djathtas e s’kanë më asnjë elektorat, një tjetër që shquhet si modeli i vjedhjes dhe i zhvatjes së qytetarëve.

Çfarë është Opozita?

Opozita është një ide. Opozita duhet të jetë një ide e qartë pse duhet ta marr pushtetin, kë do të përfaqësoj me pushtetin e marrë dhe në shërbim të kuajt do të jetë, të katër personave dhe familjarëve të tyre, apo të 80% të shqiptarëve që ndjehen të përjashtuar, të tradhtuar, të papërfaqësuar dhe të mashtruar për më shumë se 70 vjet.

Çfarë është Opozita?

Opozita duhet të jetë një formë politike me pjesëmarrje dhe përfaqësim demokratik. Një Opozitë që nuk e pranon demokracinë në gjirin e saj nuk premton aspak një model demokratik qeverisës. Katër persona, njëri prej tyre hajdut, nuk përfaqësojnë as shumicën e shqiptarëve e as modelin e demokracisë, por premtojnë qartë diktatin e të katërve kundër 80% të shqiptarëve.

Çfarë është Opozita?

Opozita duhet të jetë filozofi politike. Një lëvizje politike, qoftë edhe identifikuar si Opozitë, nëse nuk ka një filozofi të qartë politike veprimi, organizimi dhe qeverisëse, është thjeshtë një grupim i disa personave, që përtej interesave të tyre personale nuk shikojnë asgjë të tjetër. Filozofia e Opozitës duhet të jetë ajo e gjithëpërfshirës dhe me qëndrime konkrete për çështje konkrete.

Çfarë është Opozita?

Opozita është objektiv politik. Çdo Opozitë duhet të kërkoj të marr pushtetin, jo si triumf personal, por si një betejë serioze për ta vendosur në shërbim të administrimit dhe të qeverisjes së Publikes.

Çfarë është Opozita?

Opozita është shpresë konkrete për një të ardhme më të mirë, por në të njëjtën kohë një betejë aktuale dhe konkrete për të mundurën të “ligën” që robëron, poshtëron dhe nënshtron cdo ditë qytetarët.

Çfarë është Opozita?

Opozita duhet të jetë një alternativë reale qeverisje, ndryshe nga aktualja dhe po ashtu ndryshe nga e kaluara. Nëse Opozita e mendon vetën e saj për të risjellë përsëri në pushtet ato pese person që kanë njëzet vjet në pushtet, atëherë ajo nuk është Opozita e shqiptarëve e për pasojë nuk ka asnjë ndryshe nga Pozita aktuale. Alternativa qeverisëse nuk garanton pa frymëzim, gjithëpërfshirje dhe pa beteja reale me sakrifica të përbashkët në emër të demokracisë dhe për demokracinë.

Çfarë është Opozita?

Opozita është kauzë në të cilën duhet ta gjejnë vetën shumica e shqiptarëve dhe jo pesë persona për interesat e tyre të ngushta. Nëse një Opozitë, qoftë edhe ajo aktualja nuk është kështu siç e kemi rreshtuar më lartë , ajo nuk është Opozita premtuese, fituese dhe sfiduese kundër Regjimit, i cili vazhdon të ketë në dorë garanci të pa kufizueshme për të qëndruar në pushtet në përjetësi. Po ashtu nëse një Opozitë, qoftë edhe kjo aktualja nuk është siç kemi theksuar më sipër, ajo nuk shpresa dhe alternativa e shumicës së shqiptarëve. Përkundrazi, një barrierë reale për të ndërtuar një Opozitë të vërtetë, gjithëpërfshirëse që do të trondiste themelet e pushtetit aktual duke e rrëzuar atë në mënyrë të pamëshirshme.