Çfarë shkruante Kadare për fituesin e ‘Nobelit’ që mbronte krimet e Milosheviçit

Peter Handke, fitues i çmimit ‘Nobel’ në Letërsi, për vitin 2019, është ndoshta për momentin, personazhi më i urryer në Shqipëri, për shkak se dikur ka mbrojtur krimet e Miloshevicit në Bosnjë dhe Kosovë, madje duke mbajtur edhe fjalim në varrimin e kasapit të Ballkanit.

Ismail Kadare nuk e ka komentuar këtë çmim por ka folur për Handke këtu e 20 vite më parë.

Gazeta letrare “Exlibris” ka publikuar sot qëndrimin e Kadaresë për Peter Handken, në ditarin e tij për Kosovën “Ra ky mort e u pamë”.

Ismail Kadare, 20 prill 1999

Televizioni austriak më kërkon një mendim për qendrimin e Peter Handkes. Në Austri dhe në Gjermani ka fushatë të ashpër kundër tij. Ai qendrim, ç’është e vërteta, më shumë se zemërim, më ka shkaktuar brengë. Siç ndodh me njerëzit që i njeh. Siç ndodh me sjelljet që ndryjnë brenda një mister.

Shkrimtari më i njohur i Austrisë. Me nënë sllovene. Frankofon. Prej vitesh, duke qenë këshilltar pranë shtëpisë botuese austriake “Residennz Verlag”, është ai që ka propozuar librat e mi për përkthim.

E kam njohur para ca vitesh në Paris. Ambasadoja e Austrisë në Francë na ftoi për darkë të dyve, bashkë me gratë. Gruaja e tij franceze është e admirueshme.

Nuk e gjej dot ç’grerëz e ka pickuar. Gjithë ai tërbim kundër shkrimtarëve boshnjakë, gjithë ai zell për të mbrojtur krimet serbe në Bosnjë e pastaj në Kosovë.

Një shkrimtar kroat përpiqet ta shpjegojë me zanafillë frojdiste. Nuk më besohet.

Ndërkaq, nga darka në ambasadën austriake më kujtohet një frazë e tij. Një frazë disi e veçantë, e thënë me njëfarë pikëllimi: “nuk jam më i njohur si më parë”.

A mund të jetë atje ana e së keqes? Ndoshta, pse jo.