“Jam plotësisht dakort me Ilir Metën, por do t’ia vështirësonte shumë misionin Ramës dhe Bashës nëse…”, Patozi: Ka vetëm një kusht për të qenë i besueshëm

“Lidhur me Kosovën mirë shumë nuk ndihemi pasi na duket sikur zgjedhjet në Kosovë ishin sikur zgjedhjet në Danimarkë në raport me disa probleme jo se shqiptarët këtu nuk duan të bëjnë zgjedhje të tilla por lidershipi politik ua ka bërë të vështirë. Zgjedhjet në Kosovë kanë veçanti edhe sistemin elektoral. Ata kanë lista të hapura”.

Ishte pikërisht kjo deklaratë e bërë një ditë më parë nga kreu i shtetit Ilir Meta, ajo të cilës i referohet ish deputeti Astrit Patozi sot dhe thotë se bie dakort plotësisht.

Në një postim në rrjetet sociale, Patozi shprehet se “do ta mbështesja më shumë në rast se do të shikoja që ky këndvështrim do të shndërrohej në qëndrim zyrtar të LSI-së, si njëra nga partitë kryesore të opozitës. Por mbi të gjitha, mendoj se do t’ia vështirësonte shumë misionin Edi Ramës dhe Lulzim Bashës për ta mbajtur me thonj statuskuonë e listave të mbyllura, si thelbi i një pushteti okult dhe të pamerituar që është keqpërdorur për më shumë se 10 vjet”.

NGA ASTRIT PATOZI

JAM DAKORD PLOTËSISHT ME ILIR METËN

Jam dakord plotësisht me Presidentin e Republikës, kur thotë se gjendja politike në Shqipëri u rëndua pas ndryshimeve kushtetuese të vitit 2008.
Por do ta mbështesja më shumë në rast se do të shikoja që ky këndvështrim do të shndërrohej në qëndrim zyrtar të LSI-së, si njëra nga partitë kryesore të opozitës.

Do të ishte një kontribut i mirëpritur për kauzën e ndryshimit të sistemit, i cili, sipas meje, është përgjegjësi kryesor për krizën e thellë politike në Shqipëri.

Por mbi të gjitha, mendoj se do t’ia vështirësonte shumë misionin Edi Ramës dhe Lulzim Bashës për ta mbajtur me thonj statuskuonë e listave të mbyllura, si thelbi i një pushteti okult dhe të pamerituar që është keqpërdorur për më shumë se 10 vjet.
Koha i ka dhënë të drejtë Ilir Metës, i cili asokohe ishte në grevë urie për ta kundërshtuar kryetarokracinë, ndërsa unë kam qenë njëri prej atyre që e kanë votuar atë gabim historik, edhe pse nisur nga një qëllim i mirë.

Por politika është dinamike dhe askush nuk mund të mburret për një meritë të dikurshme dhe as të mbajë në shpinë një faj gjithë jetën.

Jo thjesht ngaqë “koka e falur nuk pritet”, por edhe sepse ka gjithmonë kohë dhe mundësi për t’i ndrequr problemet e shkaktuara nga vendimmarrje të gabuara.
Ka vetëm një kusht për të qenë i besueshëm: që, si ndjesa, ashtu edhe distancimi, duhet të bëhen pa hipokrizi.

Leave a Reply

Your email address will not be published. Required fields are marked *