Zbulohet drafti për Këshillin Europian: Të hapen negociatat me kushte për Shqipërinë

Këshilli Europian rekomandon hapjen e negociatave me Bashkimin Europian për Shqipërinë dhe Maqedoninë e Veriut.

45478

Në një dokument që Këshilli ua ka dërguar ministrave të Jashtëm të vendeve anëtare të Bashkimit Europian, vlerësohet se të dyja vendet e meritojnë fillimin e këtij procesi shumë të rëndësishëm.

Duke vlerësuar progresin që Shqipëria dhe Maqedonia e Veriut kanë bërë, sugjeron që vendet anëtare të hapin dritën jeshile për të dyja këto vende. “Këshilli më 18 qershor 2019 vlerëson pozitivisht rekomandimet e Komisionit për të hapur negociatat e anëtarësimit me Republikën e Maqedonisë së Veriut dhe Shqipërisë, bazuar në vlerësimin pozitiv të Komisionit për përparimin e bërë dhe për përmbushjen e kushteve të identifikuara nga Këshilli dhe ra dakord për ta kthyer në çështje, me synimin për të marrë një vendim të qartë dhe thelbësor sa më shpejt të jetë e mundur dhe jo më vonë se tetori i vitit 2019.

Në këtë kontekst, Këshilli thekson rëndësinë që BE-ja mund të ruajë dhe thellojë zhvillimin e vet, duke përfshirë aftësinë e saj për integrimin e anëtarëve të rinj. Këshilli nënvizon nevojën për një reflektim në bërjen e procesit të pranimit më efektiv, veçanërisht në drejtim të reformave të përdorimit dhe intensifikimin e angazhimit dhe mbështetjes së BE-së për transformimin e Ballkanit Perëndimor. Instrumentet ekzistuese të bashkëpunimit midis BE-së dhe vendeve kandidate duhet të kontribuojnë në një mënyrë më strategjike për përafrimin e tyre me BE-në”, thuhet në draftin paraprak, që iu është dërguar vendeve anëtare një ditë para se të takohen ministrat e Jashtëm.

Por edhe këtë herë, si në vendimin që mori Bundestagu gjerman pak javë më parë, për Shqipërinë ka një diferencim. Për Maqedoninë e Veriut, në këtë dokument Këshilli Europian ka vetëm një këshillë: që të vijohet me procesin e reformave të nisura. Për fqinjët tanë vlerësohet si thelbësore firmosja e marrëveshjes së Prespës me Greqinë, duke përbërë një garanci për një rajon të qetë dhe me fqinjësi të mirë në të ardhmen. Ndërsa për Shqipërinë, në këtë draftraport Këshilli vendos 7 kushte.

Duke filluar që nga Reforma në Drejtësi dhe ngritja e organeve të reja që janë ende pezull, te Reforma Zgjedhore e deri te kushti për ndëshkimin e personave të akuzuar për krime elektorale, janë elementet thelbësore që kërkohen që të plotësohen nga Shqipëria. Një pikë të veçantë në këtë dokument ka edhe çështja e vendimit që do të marrë Gjykata Kushtetuese për zgjedhjet e 30 qershorit, pasi të ngrihet.

Organi i lartë i Bashkimit Europian bën apel që çfarëdo lloj vendimi që do të marrë kjo gjykatë, duhet të zbatohet brenda 6 muajve të parë të vitit të ardhshëm. “Këshilli mirëpret faktin që vendi ka demonstruar vendosmërinë e tij për të përparuar në axhendën e reformave të kërkuara nga BE-ja dhe ka dhënë rezultate të prekshme dhe të qëndrueshme, duke përmbushur kushtet e identifikuara nga përfundimet e Këshillit të qershorit 2018 për hapjen e negociatave. Këshilli mirëpret faktin që dëshira e politikës për të ecur përpara është demonstruar vazhdimisht nga qeveria, pavarësisht klimës politike tejet të polarizuar”, thuhet në hyrjen e dokumentit për Shqipërinë.

Ky dokument është një tjetër ndihmë që vjen për Shqipërinë dhe Maqedoninë e Veriut, me qëllim që ato të nisin procesin e negociatave me Bashkimin Europian pranverën e vitit të ardhshëm. Draftraporti pason letrën e hapur të krerëve të Bashkimit Europian, ku pak ditë më parë David Sassoli, Donald Tusk, Zhan Klod Junker dhe Ursula van der Lejen kërkuan nga vendet anëtare që të japin dritën jeshile për të dyja vendet.

Para se te hapen kapitujt e pare, Shqiperia duhet te adresoje ceshtjet e meposhtme:

  • Fillimin e hetimeve për gjyqtarët dhe prokurorët e dyshuar për lidhje kriminale, si rezultat i gjetjeve nga procesi i vetingut;
  • Fillimin e hetimeve për çështjet e manipulimeve zgjedhore;
  • Sigurimin e funksionimit të SPAK-ut;
  • Forcimin e mëtejshëm të historikut të hetimeve, procedimeve dhe dënimeve në luftën kundër korrupsionit e krimit të organizuar, përfshirë edhe në nivelet e larta;
  • Miratimin dhe zbatimin e Reformës Zgjedhore në përputhje me rekomandimet e OSBE/ODIHR-it;
  • Ngritja e Gjykatës Kushtetuese;
  • Zbatimin e çdo vendimi të Gjykatës Kushtetuese në lidhje me zgjedhjet lokale të 30 qershorit.