Zbulohet ilaçi i parë, që mund të ngadalësojë Alzhajmerin

Një kompani amerikane ilaçesh thotë se ka krijuar terapinë e parë që mund të ngadalësojë sëmundjen e Alzhajmerit dhe është gati ta hedhë atë në treg.

Aktualisht, nuk ka ilaçe që mund ta bëjnë këtë –  veç njerit që lehtëson simptomat.

“Biogen” njoftoi se së shpejti do të kërkojë miratimin nga enti rregullator në SHBA për ilaçin inovativ, të quajtur “Aducanumab”, shkruan BBC.

Kompania po planifikon të paraqesë dokumentet në fillim të vitit 2020 dhe ka plane edhe për në Evropë. Proceset e miratimit mund të zgjasin një vit ose dy.

Nëse del me sukses, kompania synon fillimisht të ofrojë ilaçin për pacientët e përfshirë më parë për studimet klinike të ilaçit.

Njoftimi është disi befasues, sepse kompania kishte ndërprerë punën për ilaçin në mars 2019, pas rezultateve testuese zhgënjyese .

Por kompania thotë se një analizim i ri i një përmbledhjeje të madhe, i të njëjtave studime, tregoi se doza më të larta të “Aducanumab” mund të japin një përfitim domethënës për pacientët me Alzheimer të hershëm, që ngadalëson sëmundjen e tyre dhe kësisoj, ata e ruajnë më shumë kujtesën e tyre dhe aftësitë për të jetuar, aftësi që zakonisht kjo sëmundje ua merr.

Ilaçi Aducanumab përmban një proteinë të quajtur amyloid,  që formon depozita anormale në trurin e njerëzve me Alzheimer.

Shkencëtarët mendojnë se këto pllaka janë toksike për qelizat e trurit dhe se pastrimi i tyre duke përdorur drogë do të ishte një përparim masiv në trajtimin e demencës, edhe pse nuk është një kurë.