6 ditë betejë me jetën te Trauma, vdes Andi Maloku, shoferi i prokurorit Ndoja

Ka ndërruar jetë pak më parë në Spitalin e Traumës në Tiranë, Andi Maloku, shoferi i prokurorit të Durrësit Arjan Ndoja, pas atentatit që ju bë te mbikalimi i Shkozetit.

Burime nga Spitali i Traumës, aty ku Maloku ndodhej i shtruar prej gati një jave si pasojë e plagëve të rënda të shkaktuar nga breshëria e plumbave që u “derdhën” mbi të, Arjan Ndojën dhe Landi Muharremin.

Andi Maloku ishte i vetmi prej të plagosurve që u transportua me urgjencë nga Spitali i Durrësit drejt Traumës, pasi plumbat e kishin marrë në shpatullë dhe në shtyllën kurrizore. Bluzat e bardha kanë konfirmuar se 30 vjeçari ka ndërruar jetë në orën 18:20 minuta të kësaj pasditeje, ndërsa ata nuk kanë mundur ta shpëtojnë dot, pavarësisht përpjekjeve, pasi Malokut i ishin dëmtuar organet jetësore.

Andi Maloku ka punuar më parë si punonjës policie në Krujë por është tërhequr me kërkesë të tij nga detyra, për tu bërë më pas shoferi personal i prokuorit të Durrësit Arjan Ndoja.

Kujtojmë se, pasditen e 1 nëntorit mjetit me të cilin udhëtonin Andi Maloku, prokurori Arjan Ndoja dhe i quajturi “i tmerrshmi i Sukthit” Landi Muharremi, u qëllua me breshëri plumbash nga një mjet tjetër në ecje, ku dyshohet se ndodheshin 3 persona, dy qitësit dhe shoferi i mjetit.

Menjëherë pas ngjarjes, Policia dhe forcat speciale nisën kontrolle të shumta në Durrës, Fushë-Krujë e Nikël për të kapur autorët e atentatit. Mbrëmjen e asaj date, në fshatin Shkafanë të Ishmit Policia gjeti një mjet të padjegur, tip Mercedes Benz E280, i cili rezultoi se u përkiste personave që qëlluan me breshëri mbi Andi Malokun, Arjan Ndojën e Landi Muharremin, ndërsa brenda tij u gjetën dy kallashnikov, maska dhe jelek antiplumb.

Po ashtu, në mjet u gjetën dhe një palë syze të cilat çuan Policinë drejt të dyshuarit të parë për ngjarjen, Redjan Rrajës, nipi i deputetit socialist Rrahman Rraja. Në mjetin e braktisur u gjetën veç syzeve dhe gjurmë gishtash që implikonin direkt Redjan Rrajën, ndaj të cilit Gjykata për Krimet e Rënda ka dhënë masën e sigurisë “Arrest me burg”.