Autori i atentatit ndaj prokurorit i përfshirë në fushatë? Flet deputeti

Deputeti socialist, Rrahman Rraja, ka folur në lidhje me arrestimin e Redjan Rrajës, si një prej autorëve të dyshuar të atentatit ndaj prokurorit Arjan Ndoji, Andi Malokut dhe Pëllumb Muharremit, i njohur si “Rrumi”.

Rraja ka shpjeguar se prej 3-4 muaj nuk ka pasur komunikim me Redjan Rrajën, ndërsa thekson se nuk ishte në dijeni për përfshirjen e tij në ngjarje të tjera kriminale.

Ai është pyetur neëse Redjan Rraja është angazhuar në fushatën zgjedhore në mbështetje të tij, por deputeti socialist është përgjigjur duke thënë; “Me mua? Si gjithë qytetarët e tjerë. Nuk kam dijeni nëse ka precedentë penalë. Që kur ka mbaruar 8-vjecaren se di çfarë bën. Vitet e fundit di që ka pas hapur një biznes në Fushë Krujë. Nuk e di ku jeton, në Tiranë, Durrës a Fushë Krujë.”

Kur keni folur për herë të fundit?
Nuk më kujtohet. Ka 3-4 muaj që nuk e kam parë.

A është angazhuar në fushatë me ju?
Me mua? Si gjithë qytetarët e tjerë. Nuk kam dijeni nëse ka precedentë penalë. Që kur ka mbaruar 8-vjecaren se di çfarë bën. Vitet e fundit di që ka pas hapur një biznes në Fushë Krujë. Nuk e di ku jeton, në Tiranë, Durrës a Fushë Krujë.

Po me fëmijët tuaj a ka komunikim?
Nuk e di se me kë flet në telefon ai, di që me mua personalisht nuk ka.

Është hera e dytë që mbiemri juaj përflitet për ngjarje të bujshme, si ndiheni?
Jam shumë i qetë, por për sa i përket veprës jam i shqetësuar, sepse të bëhet një atentat ndaj prokurorit, ndaj drejtësisë, është shqetësim.

Keni dijeni që Redjan Rraja është një prej personave të akuzuar për një vrasje të bujshme?
Jo, atë që ka dhënë media po.

Si e mësuat lajmin ditën e sotme?
E mësova përmes medias. Më morën në telefon gazetarë.

Po veprimet e Rrajës si i gjykoni?
Është shumë e rëndë kjo që ka ndodhur.

Një koment mbi deklaratat e Ramës për prokurorin Ndoji?
Nuk e njoh fare prokurorin, asnjërin prej tre personave që ishin në makinë nuk i njoh. Unë jam shumë i qetë personalisht, gëzoj respekt dhe kam përkrahje masive në komunitet, jo vetëm në Krujë, por kudo që kam kontakt. Jam një preson që dua të bëj vetëm detyrën./ Opinion.al