Heshtja e çuditshme e Sali Berishës

Nga Dritan Hila

Ka mëse një javë që jeta politike është ndezur flakë. Në vijën e parë të sulmit është Presidenti i Republikës, Ilir Meta.

Pas sherrit me emrat e personave që do të jenë në Gjykatën Kushtetuese, lufta është ndërkombëtarizuar duke shpallur person ‘non grata’ shefin e Misionit të OSBE-së, Boshard.

Është Meta i cili ka mëse një javë që gjithashtu kërcënon me padi penale dhe i del zot protestuesve të Astirit. Po ashtu edhe LSI e cila në këtë moment beteje nuk mund të lërë vetëm themeluesin e saj.

Por ajo që bën përshtypje është qëndrimi i aleatit kryesor të opozitës, PD-ja.

Në rastin e Astirit, PD-ja u mjaftua me një deklaratë të vakët. Ndërkohë Lulzim Basha ka dalë në takime, në qarqe në një fushatë të stilit amerikan dhe ngjan se nuk i intereson përplasja që Meta po zhvillin me mazhorancën.

Por ca më shumë, guruja i demokratëve, Berisha, ngjan se po merret me lexime librash. As edhe një lajm nuk vjen prej tij, hiq një foto të Edi Ramës në stadium.

As qeveria nuk ngjan se ka marrë ndonjë demarsh politik. Më tepër sesa luftë e ndezur, ngjan se ia ka lënë rrjedhën e ngjarjeve ose rastësisë ose, ndërkombëtarëve.

Kurse ndërkombëtarët janë më aktivë se kurrë. Ambasadorët dhe përfaqësues të lartë të BE-së janë prezent thuajse përditë. Vetë amerikanët të udhëhequr nga zv/ambasadorja, janë shqeto në qëndrimet e tyre për Reformën në Drejtësi.

Cila është arsyeja e kësaj gjendjeje politike dhe pse në daljet e tij televizive presidenti është elokuent si asnjëherë më parë dhe është i gatshëm të luftojë në të gjitha frontet?

A është vallë ai kurbani i parë i rezultatit të Reformës në Drejtësi dhe faktorët e tjerë si Berisha dhe Rama kanë marrë një indulgjencë të përkohshme?

A është i trembur për veten e tij Ilir Meta, apo vërtet shqetësimi i tij është kapja e shtetit nga Edi Rama me duart e ndërkombëtarëve?

Këtu jemi dhe do të shohim./dritare.net