Sarri i tregon derën mbrojtësit të Juves, Leonardo e do te PSG-ja

Matia De Shiljo u rikthye në fushë kundër Torinos, pas gati një muaji mungesë, por paraqitja e tij në derbi ishte aq e dobët, sa duket se ka tërbuar totalisht trajnerin Mauricio Sarri.

 

Siç specifikon media torineze, 60-vjeçari, edhe pse zgjodhi vetë që ta hidhte në fushë titullar futbollistin 27-vjeçar, ka mbetur aq i pakënaqur nga De Shiljo, sa ditën e djeshme u ka kërkuar drejtuesve të klubit ta nxjerrin në merkato, që në janar, pasi me parametrat e tij, ai nuk mund të jetë pjesë e skemave të Sarrit.

Por, me të qarkulluar ky lajm në median italiane, një përgjigje shumë pozitive për numrin 2 të Juves ka ardhur nga Franca, ku “Le Parisien” nënvizon se drejtori sportiv i PSG-së, Leonardo, është gati që ta marrë në skuadër De Shiljon, për të zëvendësuar “rebelin” Kurzava. Fundja, korsia e djathtë në Torino nuk ka më vend për De Shiljon, pasi ajo është e kompletuar me dyshen Kuadrado-Danilo.

Leave a Reply

Your email address will not be published. Required fields are marked *