BURGOSJA E ZYRTARËVE SHQIPTARË TË KORRUPTUAR, DO T’ I KUSHTOJË AMERIKËS, 2 MILIONË DOLLARË.

Nga Valbona MEZINI

 

Reforma në Drejtësi është nën lupën e mikroskopit të Shteteve të Bashkuara.
Kjo e fundit po ndjek me vëmendje të jashtëzakonshme gjithë hapat e reformës, që nga ngritja e organeve të posaçme të pavarura, deri tek dosjet e zyrtarëve apo ish-zyrtarëve të lartë, që do të shqyrtojnë këto organe. Investimi i SHBA- ve, me një vëmendje kaq të madhe, duket se është në të mirë të popullit shqiptar, ku herë pas here vetë përfaqësia diplomatike amerikane në Tiranë, është përpjekur të mbajë të informuar publikun shqiptar përmes video-mesazheve, dhe takimeve të herë pas hershme mes titullarëve të Ambasadës dhe Shtetit Shqiptar të publikuara në faqen e saj zyrtare.

Në fakt, Reforma në Drejtësi është e shumëkërkuar nga koha dhe nevojat ku gjendet populli shqiptar.

Në kushtet kur korrupsioni në Institucionet e larta të Drejtësisë dhe institucionet e shërbesave publike vijon të jetë akoma i madh, e Shqipëria kryeson për të disatin vit, listën e Transparency International për këtë fenomen ekonomiko- shkatërrues, reforma është ekzigjencë kombëtare.

Reformat e ngadalta që ndërrmori politika në vite dhe mungesa e vullnetit nga ligjzbatuesit, për t’a luftuar korrupsionin, kanë dëmtuar jo vetëm imazhin e vendit ndërkombëtarisht, por edhe kanë zbrazur Shqipërinë. Çdo muaj sipas Eurostatit, rregjistrohen si azilkërkues 2000 shqiptarë në vendet e BE, aq sa alarmi që grenë institucionet e huaja në periudha afatgjate, konkludojnë se me ritme të tilla të largimit masiv, mund të shuajnë këtë kombësi. Ndërsa në periudhë afatshkurtër, dëmi i shkaktuar biznesit vendas për fuqi puntore dhe konsum, është shumë i madh.

Në të tilla kushte, Reforma në Drejtësi mbetet e vetmja zgjidhje për ekonominë e Shqipërisë dhe mirëqenien e shqiptarëve, për të cilët pak ose aspak është menduar në 30 vite tranzicion.

Dështimi dhe mungesa e vullnetit politk për Reformën e Pronës, e cila edhe sot vijon të jetë ngërçi më i madh i pronarëve dhe ekonomisë, është një lak në fytin e ekonomisë shqiptare që nuk lejon frymëmarrjen e saj.

Me të drejtë amerikanët dhe jo vetëm, janë investuar për një Shqipëri më të mirë dhe ekonomi të qëndrueshme rajonale. Së shpejti në 19 Dhjetor nis punën një nga strukturat goditëse të korrupsionit galopant, SPAK. Ky organizëm i ri i panjohur më parë është një nga instancat që do të godasë drejtëpërdrejt korrupsionin e niveleve të larta, me përzgjedhjen e anëtarëve të tij, të cilët pritet të betohen përpara Presidentit të Republikës në 19 Dhjetor. Struktura e Posaçme Anti-Korrupsion dhe Krim i Organizuar, ose SPAK, për të qenë dhe punuar e pavarur i ka kushtuar qeverisë amerikane 2 milionë dollarësh.

Ngritja e SPAK, do të jetë fundi i një marrëzie që ka vënë përfund disa nga çështjet më të mëdha ekonomike si Pronat, PPP, apo shpërdorimi i parasë publike.

Si rezultat i ndërveprimit të Zbatimit të kësaj Reforme, Drejtoresha e Byrosë për Çështjet Ndërkombëtare të Zbatimit të Ligjit dhe Luftës ndaj Drogës në Ambasadën e Shteteve të Bashkuara Julie Craven, u takua në Tiranë, me Drejtorin e Përgjithshëm të Burgjeve Agim Ismaili, për të biseduar mbi planet e Shteteve të Bashkuara për të mbështetur reformën e burgjeve në Shqipëri.

Me një investim fillestar prej 920,000 dollarë, Byroja për Çështjet Ndërkombëtare të Zbatimit të Ligjit dhe Luftës ndaj Drogës, do të ndërtojë programe që do shënjestrojnë burgjet ku mbahen disa prej kriminelëve më të mëdhenj, thuhet në një status të Ambasadës Amerikane në Tiranë, çka dëshmon për interesin e madh që ky vend ka në këtë proçes.

Investimi i Shteteve të Bashkuara do të forcojë aftësinë e personelit të burgjeve për të ndalur dhe shkatërruar aktivitetin e paligjshëm pas hekurave dhe do të aktivizojë proçese për të luftuar korrupsionin në sistemin penitenciar.

Një cikël i ri për politikën dhe ekonominë shqiptare do të jetë mbrapa derës për Shqipërinë dhe Viti i Ri, do të sjellë një epokë të re për fatin e Shqipërisë dhe ekonominë e saj.