“Fondet do menaxhohen nga fondacionet” – Elvis Naçi tregon planin për Thumanën: Kemi dëshirë të ndihmojmë dhe në blloqe pallatesh

Imami Elvis Naçi gjatë mbledhjes së dytë të Komitetit të Rindërtimit u shpreh se fondet që do të mblidhen nga fondacionet do të menaxhohen nga vetë ato.

Teksa ka marrë dritën jeshile nga qeveria, Imami Elvis Naçi njofton se në Thumanë do të nisë puna për blerjen e disa banesave dhe rregullimin e atyre që janë të banueshme.

Gjithashtu ai tregoi se Fondacioni i tij do të marrë pjesë edhe në ndërtimin e blloqeve të pallateve për të prekurit.

“Fondet që do mblidhen nga fondacionet do menaxhohen nga vetë ato. Dje kam qenë në Thumanë dhe ata na thanë që pse nuk po ndërtoni. Ne i thamë që sapo të na japi dritën jeshile qeveria do nisim. Sot morëm dritën që për ato familje që kanë pak probleme apo duhet t’u blejmë një shtëpi.

Ne kemi dëshirë që të ndërhyjmë dhe të ndihmojmë dhe në blloqe pallatesh. Ata nuk kanë kesh por kanë mundësi të kontribuojnë në mënyrën e tyre.

Jemi të gjithë bashkë për një të mirë që duhet i shkojë shqiptarëve që u sprovuan kaq shumë nga tërmeti”, tha imami Elvis Naçi.