Alketë, për ty do të pimë salep. Të lutem ndihmoji pak heroinat e mia!

Nga Kreshnik Osmani

Nuk desha fare të merrëm me këtë historinë e Sanremos, pasi nuk është temë shumë e përshtatshme për të përcjellë një mesazh pozitiv, sepse njerëzit janë përgjithësisht për luftë.. Kjo për dy arsye shumë të rëndësishme. E para është se në këtë vend ka një ushtri të madhe të papunësh që rrinë tërë ditën në FB dhe nuk kanë asnjë punë tjetër përvecse të tallin dhe të ironizojnë këdo dhe cfarëdo. Nuk ka rëndësi se cfarë ka thënë, nuk ka asnjë rëndësi se cili është mesazhi. Ata duan të tallen dhe do të tallen. Së dyti shoqëria jonë është shumë e polarizuar dhe fatkeqsisht funksionojmë vetëm me marshe ekstreme. O pështymë me sharje, ose pështymë prej puthjes së shkujdesur nga dashuria e madhe.

Në FB tim kam nja 50 e më shumë zonja/vajza qe i lexoj prej vitesh me kureshtje të madhe dhe mësoj shumë prej mençurisë, stilit dhe klasit te tyre. Ato nuk i njeh njeri përveç miqve të tyre në FB. Janë dinjitare, të plotësuara plot e përplot me intelekt dhe feminitet. I zhvillojnë betejat e tyre me shumë klas e dinjitet kur i hapen dyert e jetës dhe kur ua bllokojnë ato. Ato mund të lindin e të vdesin dyqind herë në këtë qenef të ndyre kulturor ku jetojmë dhe askush të mos i qasë tek dera, as ato as telentin e tyre. Sanremon mund ta shohin vetëm me dylbi ose nga ekrani i RAI-t nëse u mbëten para për ta bërë abonimin tek kompanitë që shpërndajnë valë internet e televizioni me zorrë në formë kabujsh. Kjo ndodh sepse këto femra nuk janë pjesë e kastës. Nuk janë pjesë e establishmentit. Vijnë nga prindër të panjohur të varfër shumë që nuk i kanë shërbyer asnjë regjimi dhe asnjë konjukture. Këto janë heroinat e mia. Kam mbetur plotësisht i shokuar kur disa prej këtyre heroinave të heshtura, duke imagjinuar se une jam person i rendesishem dhe se kam mundesi t’u gjej ndonje punë më kanë nisur cv-të në inbox. Dikush është larguar qejfmbetur dhe dike e ka besuar pafuqia ime për të bërë dicka serioze për to.

A e dini sa vajza të talentuara, të bukura si hëna, të zgjuara, me katër pesë gjuhë të huaja të folura rrjedhshëm, me dy tre fakultete, me këmbë të bukura, me sy të bukura, me flokë të bukura, me mendje të bukura gjezdisin të pashpresa rrugicave të heshtura të zyrave të kastës? A e dini se cfarë heqin një pjesë tjetër që kanë arritur t’i imponohen sistemit me talentin dhe me aftësinë e tyre?  Nuk mundet ta imagjinoni sa e vështirë dhe e përgjakshme është lufta dhe beteja për mbijetesë në kënetën kulturore, intelektuale, politike dhe mediatike që ka ndërtuar kasta. Është një betejë e përgjakshme e intelektit dhe e talentit në këtë vend për t’iu imponuar lekarëve të mëdhenj që janë edhe arkitektët e modelit kulturor shqiptar në shekullin e 21. Kasta ka në dorë të gjitha instrumentat e promoimit, të reklamimit, të pasurimit, të arfirmimit, të ngritjes, të uljes dhe të poshtërimit të njerëze në këtë vend.

Alketa është e jona. Alketa është e talentuar. Alketa bën gabime si unë dhe si ti. Alketa kalon herë pas here në delir sic bëjmë unë edhe ti. Alketa ia doli të jetë aty ku gatuhet ngritja dhe ulja e njerëzve këtu në kënetën tonë. Alketa është atje lart, ku thithet ajër i pastër, ku shkohet me helikopter për t’i shpetuar trafikut, ku merren vendimet kush del në televizor dhe kush nuk del. Alketa është atje ku vendoset kush do t’i drejtojë festivalet. Është atje ku njerëzit hanë gjellë pasanikësh.  Është atje ku makinat nuk hyjnë pa lënë shenjat e gishtërinjve te shofereve te tyre tek rojat. Është atje me parinë e “Love Tropojës” dhe “Love Tironës”. Ajo është atje ku ndahen tenderat dhe koncesionet. Ajo ka mundur të jetë atje ku rri kasta dhe paria. Ajo pi ujë dhe thith ajër të njejtë me të atë të Surrelit, të Erit, të oligarkëve të medias, të politikës, të kulturës dhe të njerëzve të famshëm të këtij qenefi.

Ajo rri larg kancerit ku banojmë të gjithë ne. Ka hyrë vetë, apo është gjëndur aty rastësisht, apo ka bërë si ka bërë kete nuk e dime. Ajo tashmë është atje ku heroinat e mia nuk munden të jenë për njëmijë e një arsye. Alketa ka një ushtri të madhe kalemxhinjsh të cilëve ajo nuk u detyrohet asgjë, por që ata lëshohen si kamikazë dhe janë të gatshëm të flijohen për të marrë në mbrojtje “idhullin” dhe “perëndeshën” e tyre. Të të marrë Alketa me sy të mirë, nuk është dicka që nuk ka vlerë. Të hysh tek rrethet e Alketës, dmth je bërë automatikisht pjesë e kastës dhe e parisë plot CLASS të qenefit ku jetojmë. Pra, Alketa nuk është se ka ndonjë faj të madh se njerëz që ëndërrojnë shumë lartësitë e saj janë gati të flijohen për të mbërritur atje ku ajo qëndron. Nuk është mire ta shajmë Alketën apo ta sulojme ate pasi ajo mund të na urrejë të gjithëvë shumë. Vajzat e bukura dhe të talentuara të këtij vendi, nuk bëni mirë që e kritikoni urgananin e Sanremos, sepse ajo mund të hakmerret ndaj jush. Alketa është tek e fundit një grua, që ndjen, ka dhimbjet e saj, ka lumturitë e saj, ka ëndrrat e një femre, frikërat, dëshirat, fobitë, xhelozitë e një gruaje përse jo, të një nëne, të një arstisteje, të një femre të pushtetshme.

Ti Alketë mund të bësh shumë për vajzat dhe gratë e talentuara të këtij vendi. Ti mund të bësh shumë për heroinat e mia që i kanë lënë pa punë. Ti Alketë me të gjithë arsenalin e intrigave, të dashurisë dhe të dhëmbshurisë me të cilat Zoti e ka pajisur një femër, mund të jesh agjentja e mjerimit e infiltruar tek kasta. Kjo do të thotë, që në ndonjë ditë, kur ti ndihesh plotësisht bosh dhe e gjithë fama, pasuria, pushteti të mos kenë asnjë vlerë për ty. Kur të jesh në një moment vetmie ku e gjithë pasuria dhe luksi i botës nuk mund ta zëvendësonte atë që ta dhuron një përqafim  dhe një kompliment i sinqertë prej dikujt që nuk e ka patur fatin tënd në jetë, hidhu menjëherë në sulm dhe ushtroje të gjithë ndikimin tënd, që heroinave të mia të talentuara t’i gjejmë një vend pune dhe t’i bëjmë ato të famshe sikurse je ti. Nëse ia del t’i ndihmosh heroinat e mia të pafuqishme, atëherë përse jo, nëse është dimër i ftohtë si tani e pimë të gjithë bashkë nga një salep!

Rrofsh e Qëllofsh!  /Puls7.com