Puna për tërmetin, Rama debat me gazetarin: Të fillojmë sa më parë, që të kapim Marinin

Tryeza e katërt e komitetit kombëtar të Rindërtimit është përcjellë me debate mes Ramës e gazetarit Marin Mema.

Ky i fundit si pjesë e shumë fondacioneve që kanë mbledhur donacione për t’i shkuar në ndihmë shqiptarqve të prekur nga tërmeti, i komunikoi kryeministrit se disa banesa i ka ndërtuar. Gazetari shpjegoi se ka ‘shkelur’ rradhën dhe rregullin e punës, por ka argumentuar se banesat e ndërtuara i kanë shkuar familjeve që jetonin në kushte esktreme pas tërmetit.

Por duket se kjo nuk i ka pëlqyer aspak kryeministrit, i cili fillimisht e pyeti nëse i kishte bërë me leje, ndërsa më tutje e ironizoi gazetarin.

Për më tepër ndiqni një pjesë të debatit:

Mema: Nuk dua të hap debat. Ne nuk kemi nisur si garë ndërtimin e shtëpive, por po përpiqemi të ndihmojmë familjet. Ne kështu e kemi menduar. Për të dhënë në fund të ditës një lloj drite shprese, që rindërtimi është duke filluar.

Rama: Me apo pa leje i keni bërë shtëpitë?

Mema: Të gjitha me leje. Ne nuk do të bënim asnjë ndërtim pa leje, për t’u bërë të jashtëligjshëm, për ne është ligji në radhë të parë.

Rama: Në radhë të parë duhet respektuar kjo tryezë. Çdo ndihmë që vjen për familjet është e mirëpritur që të sistemojmë këto familje. Arsyeja themelore pse kemi kërkuar këtë bashkërendim është që të mos i bëjmë gjërat shpejt sot dhe nesër të paguajnë kosto njerëzit. Do ishte kollaj të thonim hajde bëjmë ca gjëra, por duam që të gjitha modelet të jenë të strukturuara, me të gjitha parametrat. I gjithë procesi shkon në një drejtim. Nuk duhet të vazhdojë ky proces në mënyrë individuale. Jemi këtu për një qëllim, duam ta bëjmë sa më shpejt, por shpejtësia ka një limit, pasi pa limit na çon në drejtim tjetër.

Shumë shpejt kjo historia e vënies në diskutim të modeleve do fashitet komplet, sepse bëhet fjalë për standarde shumë më të larta se standardet ekzistuese të godinave. Nga pikëpamja sizmike, ekologjike, edhe eficencës së energjisë, janë godina të konsoliduara, që përdoren në vendet e zhvilluara. Ajo që na duhet është të fillojmë punën një orë e më parë, që të kapim Marinin.

Mema: Vështirë pak kjo.