Lamtumirë miku im i dashur, studijuesi, profesori, shkrimtari, etnologu e atdhetari Prof. Dr. Agron Fico

Prof. Fico ishte një personalitet i njohur në fushën e etnografisë. Ai në vitin 1961 ka hapur katedren e gjuhës shqipe në kryeqytetin kinez Peking ku jetori deri në vitin 1965. Më vonë pas kthimit në Shqipëri kishte punuar bashkë me shumë studijues të tjerë në fushën e gjuhësisë dhe etnografisë. Prof. Fico kishte emigruar në Amerikë ku e kishte hapur katedrën e gjuhës shqipe në shtetin Michigan.

Me të arritur në New York, i ishte bashkangjitur veprimtarisë patriotike që organizohej nga figurat e njohura të shqiptarëve që jetonin në New York dhe rrethinë. Shumica e njihnin si Agron Kosova sepse rrinte e vepronte bashkë me ata që i shërbenin çështjes së Kosovës me devotshmëri.

Rrinte gjithmonë i buzëqeshur dhe thoshte se krenaria e të qenurit shqiptar më bën të ndjehem i gëzuar.

Sa here që dilja me bacen Ahmet Zherka dhe me prof. Ficon e fitoja nga një libër ose artikull, këshillë apo sqarim prej tyre. Kam mësuar shumë për Gjirokastrën e Shkodrën ku e kishte kaluar rininë. Kam mësuar për Tiranën, Pekingin, Detroitin e New Yorkun ku ai kishte jetuar e krijuar. Ishte një orë mësimi e ndjenjë krenarie kur rrija me Agron Kosovën.

Për shumë vite e kisha bashkëpunëtor të rregullt dhe me shkrimet e tij më jepte kurajo të mos ndjehem i lodhur nga zanati im.

Me 25 Maj 2020 më dërgoi shkrimin e tij të radhës dhe në fillim e kishte shkruar: “Urojmë të gëzosh shëndet të plotë” duke shprehur brengën e tij për pandeminë që e kishte ngulfatur jetën në New York që nga muaji mars. Në shkrimin e tij të radhës, Prof. Fico kishte vënë titullin “Mbahu nëno mos ke frikë, se ke djemt në Amerikë” duke këshilluar shqiptarët që ta duan Amerikën.

Lamtumirë mik i dashur Agron Fico!

Kujtimi dhe krenaria që jam njohur me ty do të mbeten të përjetshme!

Do të na mungosh shumë në New York-un që dikur i jepje dritë!

Ngushëllime për zonjën Lirije, vajzat Albana e Delina si dhe nipin Martin të cilin profesori e donte shumë!

 

Me pikëllim të thellë,

Qazim Doda