LSI ndahet nga Partia Demokratike: Lista të veçanta

Luan Rama

LSI duket se do të marrë pjesë me listën e saj në zgjedhjet e 25 prillit, duke mos dalë në një lsitë të përbashkët me Partinë Demokratike.

Zv.kryetari i LSI-së Luan Rama në një intervistë për Euronews Albania tha se partia e tij duhet të dalë para qytetarëve me programin dhe emrat e saj, pasi është një forcë që ka identitetin e vet.

“Ne jemi në një proces intensiv kontakti me qytetarët për të evidentuar njerëzit që do duhet të kandidojnë. Në vlerësimin tim, LSI, si një forcë me identitetin e vet duhet t’u ofrohet qytetarëve me programin dhe me emrat e saj”, u shpreh ai.

Për sa i përket qeverisjes në 8 vitet e fundit, Rama tha se politikat e kësaj qeverie anë qenë të orientuara në vjedhjen e fondeve publike, ndërsa shtoi se kryeministri e ka të qartë që do të humbasë në qytetin e Vlorës.

“LSI është e angazhuar për të bërë një fushatë model, që qytetarët duhet të kuptojnë që të votojnë për Vlorën. Në tetë vjet, të qeverisjes së një klani korruptiv dhe kriminal, në Vlorë është eksperimentuar duke vjedhur fondet publike. Fasada dhe idetë virtuale në 3D, që prezanton kryeministri, nuk janë gjë tjetër, por përpëlitje e fundit të tij në dëshpërimin e madh, dhe ai e di se goditjen kryesore do ta marrë nga Vlora”, tha ai.