Parashikimi i Berishës: Ilir Meta do ta mbyllë jetën pas hekurave të burgjeve

Sali Berisha shpjegon arsyet se pse Ilir Metën e tmerron Byroja Kombëtare e Hetimit: Ndërkombëtarët kanë përgatitur dosje për të

Ditët e fundit Ilir Meta u është rikthyer kërcënimeve, shantazheve dhe përpëlitjeve, në përpjekjen e tij për të marrë një garanci nga SHBA-BE se nuk do të jetë objekt hetimi i drejtësisë së re. Lëvizjet alarmuese të Metës përkojnë me finalizimin e procedurave për ngritjen e Byrosë Kombëtare të Hetimit. Kjo strukturë, e projektuar nga SHBA-BE, është shpresa e fundit e shqiptarëve për goditjen e krimit dhe korrupsionit në nivele të larta. Po pse Ilir Metën e tmerron Byroja Kombëtare e Hetimit? Përgjigjen e ka dhënë Sali Berisha në një falim para vitit 2009. Berisha e njeh Ilir Metën më mirë se çdo politikan tjetër në Shqipëri. Berisha ka parashikuar se Ilir Meta do ta mbyllë jetën në burg. Berisha ka deklaruar: “Për PD, Ilir Meta është njeriu që përfaqëson klanin më të rrezikshëm të trafiqeve në Shqipëri, të trafikut të drogës, të trafikut të fëmijëve dhe të trafikut të vajzave të mitura. Në historinë e vendit, ky mbetet njeriu që me bandat e tij, ngjiti Shqipërinë në krye të listës së vendeve të planetit, të trafiqeve të skllavërisë së seksit, të fëmijëve të drogës dhe armëve. Mbi këta të dy (për Ilir Metën dhe bashkëshorten e tij) rëndojnë dy varre dhe dy krime të fshehura pas malit të Dajtit. Nuk do të jetë e largët dita kur Ilir Meta do ta mbyllë jetën e tij pas hekurave të burgjeve”.

Disa vite më vonë, në vitin 2015, Berisha e akuzoi Metën se kishte porositur vrasjen e dy deputetëve. Berisha foli edhe për një dosje që ndërkombëtarët kishin përgatitur për Metën. “Jep dorëheqjen, sepse je person i akuzuar për dy vrasje. Na i nxirr pak ato që të ka sjell Edi Rama nga institucionet ndërkombëtare. Sepse ata të njohin më mirë ty se çfarë përfaqëson ti për vendin”, tha Berisha. Në atë kohë Meta ishte Kryetar Kuvendi. Disa javë më pas, doli një raport sekret i OSBE për kriminalizimin e krerëve të politikës shqiptare. Në raport nuk përmendej vetëm Lulzim Basha. Raporti fliste për përfshirjen e Ramës dhe Berishës në afera korruptive dhe pazare me pasuritë publike. Por, raporti ishte një goditje e rëndë për Ilir Metën, i cili akuzohej për vrasje, korrupsion, trafiqe dhe krim të organizuar.

Në raport thuhej se “Meta, Ilir (LSI): Interesa në ndërtim, turizëm, materialet e ndërtimit dhe energjitikës. I dyshuar për lidhje të forta me aktorë të mafias, kryesisht nga Jugu i Shqipërisë. Ka zëra se udhëroi të paktën dy vrasje, ndërsa ishte Zëvendës-kryeministër. Halit Shahini, ortak dhe korrier i Metës, dyshohet të ketë lidhje të forta me grupe kriminale në Shijak, të përfshira kryesisht në trafikun ndërkombëtarë të drogës”. Rama, për të mos prishur aleancën me Metën, i cili mbante në këmbë qeverinë, e përzuri nga Shqipëria ambasadorin e OSBE./Pamfleti