Plas sherri në Tiranë: Gruaja pëlqen Sinan Hoxhën, burri Anën e ‘Përputhen’; nëna e 2 fëmijëve tenton të vetëvritet, babai përfundon në Polici

Sinan Hoxha – Ana e Perputhen

Simpatia e deklaruar nga gruaja për këngëtarin Sinan Hoxha dhe e burrit për Anën, vajzën pjesëmarrëse në emisionin “Përputhen”, ka çuar në një grindje mes dy bashkëshortëve në kryeqytet, e cila ka përfunduar në dhunë dhe madje njëri prej tyre është arrestuar.

Gazetarja Keti Banushi e Ora News, shkruan se ngjarja e pazakontë ka ndodhur natën e ndërrimit të viteve, ku Saimir Bakalli së bashku me bashkëshorten dhe dy fëmijët kishte shkuar në shtëpinë e vjehrrit për Vitin e Ri.

Konflikti ka nisur në momentin kur bashkëshortja e Sajmirit kishte dashur të shihte në televizor këngëtarin Sinan Hoxha, të cilin ka thënë se e pëlqente. Kjo gjë ka shkaktuar xhelozi te bashkëshorti, i cili e ka akuzuar se kishte më shumë se pëlqim ndaj tij.

 

Debati ka vijuar me tej kur bashkëshorti ka komplimentuar Anën e emisionit “Përputhen”. Këtë herë ka qenë bashkëshortja që ka reaguar ndaj burrit të saj.

Grindja mes çiftit ku njeri e akuzonte për Anën dhe tjetri për Sinanin, është ashpërsuar dhe debati ka kaluar edhe në dhunë fizike. Saimiri ka qëlluar bashkëshorten, ndërsa kjo e fundit ka tentuar të vrasë veten me thikë.

Në këto çaste ka ndërhyrë babai i gruas, njëherësh vjehrri i Saimirit, për të ndarë çiftin, por edhe ai është goditur nga dhëndri. I gjithë sherri ka ndodhur ne sy të dy fëmijëve të mitur të çiftit Bakalli të cilët kanë qenë spektatorë të skenës së shëmtuar të dy prindërve.

Më pas 35-vjeçari është larguar nga shtëpia, ndërsa dy të dhunuarit i janë drejtuar policisë ku e kanë kryer denoncimin. Saimir Bakalli është arrestuar dy ditë me parë nga Blutë e Tiranës dhe këtë te enjte ka dalë para gjykatës, ku u  vlerësua me masën “arrest me burg” për akuzën e dhunës në familje.

Mësohet se 35-vjeçari ishte me arsim 8-vjeçar ndërsa bashkëshortja me arsim të mesëm.