SOT PJESA II/ Privatizimi i ‘Kompleksit Partizani’, si Berisha nisi eliminimin e zyrtarëve që nuk firmosën në favor të Jamarbër Malltezit

TIRANË– Pas interesit të jashtëzakonshëm që ka shkaktuar pjesa e parë e transmetuar ditën e hënë, sot në orën 19.30 Report Tv do të transmetojë pjesën e dytë të investigimit mbi historinë e privatizimit të Ish-Kompleksit sportiv Partizani. Në pjesën e dytë të investigimit do të tregohen gjithë lëvizjet dhe presionin që strukturat e qeverisë Berisha, edhe me firmën e vetë kryeministrit, bënë për ta dorëzuar më në fund atë truall tek Jamaber Malltezi dhe trashgimtarët e tjerë, duke ndëshkuar një gjeneral të Ushtrisë i cili me kurajo guxoi të denoncojë parregullsitë, dhe provat mbi një inspektim skandaloz për “verifikimin” e procedurave të privatizimit nga Drejtoria Antikorrupsion prane kryeministrise, që njerëz të Berishës ia ngarkuan njërit nga ish-pronarët përfitues të pronës.

Parrulla që Partia Demokratike përdori gjatë fushatës zgjedhore 2005 ishte “Koha për ndryshim”. Por, sapo ata fituan zgjedhjet dhe u kthyen në pushtet, tetë vjet pas skandalit të përgjakshëm të piramidave financiare, qeveria e Sali Berishës nuk vuri ndër përparësitë e saj ndryshimet për vendin, që kishte premtuar, por privatizimin e Kompleksit Sportiv “Partizani ” i destinuar për familjen e tij.

Për herë të parë, e gjithë dosja për privatizimin e ”Kompleksit sportiv Partizani ” ka dalë nga arkivat e ministrive me kërkesë të gazetarëve investigativë të Report TV, të cilët e studiuan atë për muaj me radhë. Falë punës kërkimore nëpër arkiva të ndryshme janë gjetur edhe dokumentet e pabotuara përpara që hedhin dyshimet edhe mbi origjinën e vërtetë të pronës.

Në nëntori 2005, vetëm dy muaj pas marrjes së detyrës, Ministri i Ekonomisë Genc Ruli dhe ministri i Mbrojtjes Fatmir Mediu filluan procedurat e privatizimit të qendrës më të madhe sportive në zemër të kryeqytetit, me përmasa 26.000 metra katrorë, qe në fund u pagua vetëm 14.000 euro. Në atë tokë sot janë ndërtuar dhe po ndërtohen ende dhjetëra kulla të kompleksit Magnet 1 dhe Magnet 2 që vlejnë 4.000 herë më shumë, nga të cilat Jamarber Malltezi, dhëndri i ”doktorit”, është bashkëpronar me mbi 40% të aksioneve. Një çështje e errët që prodhoi fitime prej dhjetëra miliona eurosh.

Ajo që del është një histori me një mijë pika të errëta, në të cilat shfaqen jo vetëm dyshime për korrupsion dhe abuzim, por që mbi të gjitha, tregojnë sjelljen e një sistemi të tërë shtetëror që, me përjashtime të rralla, pranoi të gjunjëzohej para Sali Berishës duke shkelur çdo normë etike dhe çdo procedurë vetëm që t’i shërbente shefit të tyre. Një mënyrë për të konceptuar pushtetin në sherbim të familjes dhe në konflikt të hapur interesi që klani i Berishës është gati ta ripërsërisë.

Leave a Reply

Your email address will not be published. Required fields are marked *