Virologu italian kërkon mbyllje të vendit: Evropa në karantinë, ne mendojmë për ski dhe restorante!

“Zgjidhja do të ishte një bllokimi menjëhershëm për të parandaluar që varianti anglez të ketë efekte shkatërruese si në Angli, Portugali dhe Izrael”, u shpreh ai. “Rreziku aktual është përhapja e variantit anglez, i cili nëse nuk ndalet menjëherë do të rrisë shumë qarkullimin e virusit dhe rrjedhimisht rrezikun e mëtejshëm të varianteve të tjera, përfshirë disa që mund t’i rezistojnë vaksinave”, shpjegoi Crisanti për La Print. Këshilltari shkencor i ministrisë së Shëndetësisë italiane, kërkoi gjithashtu një bllokim total për të ndaluar virusin. Ky bllokim parashikon mbylljen e shkollave, pa ndaluar aktivitetet thelbësore por me kohëzgjatje të kufizuar.

Situata në Shqipëri!

Në vendin tonë shifrat e infektimeve vijojnë të jenë shumë të larta. Prej shumë ditësh ato i kalojnë 1 mijë dhe sipas ekspertëve të shëndetësisë, kjo hedh dyshimet edhe për qarkullimin e varianteve të reja të Covidit, që mund të kenë hyrë në vend. Ora policore është zgjeruar prej së enjtes së kaluar, ndërsa ekspertët në lidhje me një mbyllje totale të vendit, kanë qëndrime të ndryshme. I ftuar në Shqip Show, nga Rudina Xhunga në Dritare Tv, epidemiologu Ilir Alimehmeti, tha se një mbyllje nuk do të na shërbente.

“Asnjëherë ndeshja e boksit nuk është fituar gjatë pushimit, por gjatë raundit”, u shpreh epidemiologu duke shtuar se një mbyllje tani, vetëm do të shtynte pandeminë.

Nga ana tjetër mjeku Indrit Seferi, specialist i Shëndetit Publik, dhe pedagog i Fakultetit të Mjekësisë, i ftuar në Shqip Show, tha se jemi në ditë kritike, ndaj mendon që një lockdown, do na shërbente në këtë moment.

Ads by Revcontent