10 ton drogë në Vlorë, shpallet në kërkim polici

Gjatë operacionit policor në Vlorë ku u kapën rreth 10 ton marijuanë, përveç gjashtë personave të arrestuar është shpallur në kërkim një punonjës i Policisë së Shtetit.

Operacioni u organizua me bashkëpunimin e Prokurorisë së Krimeve të Rënda dhe Policisë Vlorë, ku në fshatrat Vezhdanisht dhe Treblove, u asgjësuan në total rreth 7 300 rrënjë kanabis, ku 2 mijë prej tyre ishin në proces tharje.

Nga disa pamje të siguruara nga “Tv Klan” shihet qartë që kultivuesit kishin krijuar kushtet e përshtatshme për të rritur dhe me pas për të tharë bimët.

Aty janë ndërtuar rezervuare të vegjël që përdoren për vaditje, një sistem vaditës dhe vendet për të thar dhe paketuar hashashin. Në pranga kanë rënë 6 persona, me urdhër të Prokurorisë për Krimet e Rënda.droga
Shkëlqim Koçiaj, Arjan Hasanaj, Klajdi Imeri, Taulant Haxhiraj, Albert Aliaj, Xh.B, janë personat të cilët kanë mbjellë dhe kanë kultivuar 6 parcela në këto dy fshatra. Disa prej tyre u arrestuan në një lokal, në Vlorë.

Burime nga grupi hetimor sqarojnë se në kërkim është shpallur dhe një oficer policie në Drejtorinë e Krimit Ekonomik të Vlorës. Gjithashtu në cilësinë e provës materiale janë sekuestruar disa armë që përdoreshin për të ruajtur parcelat.

Në Vlorë ndodhen dy prokurorë të Krimeve të Rënda, të cilët po marrin në pyetje 6 të arrestuarit. Ata po hetohen në kuadër të një grupi të strukturuar kriminal, ku dyshohet se janë të përfshirë dhe të tjerë persona.

Për tre nga të arrestuarit ishte caktuar masa e sigurisë arrest me burg në mungesë. Për tre të tjerët ishin nxjerrë vetëm urdhëra – ndalimi.