Afrim Krasniqi: Takimi Rama-Vuçiç, show mediatik

Analisti Afrim Krasniqi e cilësoi vizitën e Ramës në Beograd me shumë si një “show mediatik” sesa një takim ku priten rezultatet për zgjidhjen e problematikave në rajon mes vendeve.

Kjo nuk ishte një vizitë zyrtare, ishte forum i përvitshëm që lejon shkëmbimin e mendim. Ligjërim që i adresohej më shumë medias se sa partnerit që kishte përballë, dhe kjo ndodhi për të dyja palët. Në aspektin e përfaqësimit të asaj që quhet interes shqiptar mendoj se përfaqësimi ishte korrekt në pjesën e Kosovës. Kryeministri mbajti po atë qëndrim që mban një kryetar shteti . Përmenendi interesat e Kosovës, përmendi nevojën e dialogut mes Prishtinës dhe Beogradit dhe atë që quhet përgjegjësia e palëve serbe për bllokimin e interesave të Kosovës dhe nevojën që Kosova ka për t’u përfshirë në proces. Batutat e shkëmbimet futen te elementët e shoë-t se sa tek diplomacia, tha Krasniqi në studion e lajmeve të Ora News.

Për refuzimin e delegacionit kosovar në pjesëmarrje për çështjen e sigurisë për shkak të arrestimit të shefit të policisë së Mitrovicës në Serbi disa ditë më parë, Afrim Krasniqi tha:

Ky eveniment ishte i atillë që nuk mund të vendoste ndonjë standart për Kosovën. Ishte më shumë një gjest politik arrestimi i zyrtarit të lartë të policisë . Nga ana tjetër kemi pasur përfaqësues të botës shqiptare në seanca të ndryshme të debatit përfshi dhe përfaqësues nga shoqëria civile e Kosovës që do të thotë se kanë pasur përfaqësues për të shprehur problematikat e tyre. Në lidhje me politikën zyrtare, Kosova pati debat të madh javën e kaluar lidhur në parlament-rezolutën dhe tregoi se nëse Kosova do t’i adresojë diçka Beogradit, ai mesazh nuk jepet as në Prishtinë as Beograd por në kancelaritë europiane. Kështu që Kosova ka zgjidhur deri diku një partneritet me kancelaritë europiane. Interesi ynë është që politikanët të shkojnë në rajon, të thonë mendimin e tyre. Nëse ata nuk na mbrojnë interesat kombëtare atëherë vlen për t’u shqetësuar, por idea që të mos shkojë fare, të mos përfaqësohet, të kushtëzojë marrëdhëniet e të gjithë botës shqiptare me një shtet nk më duket serioze. Kjo në Ballkan ndodh.

“Kjo është hera e katërt që Rama shkon në Serbi. Mund të themi se ka një marrëdhënie të re të vendosur nga Rama me Serbinë dhe çfarë impakti ka kjo për vendin tonë, dhe politikat në përgjithësi”, është pyetur ai.

Krasniqi: Them se Rama e dashuron idenë e vajtjes në Serbi, edhe pse deri diku ka qenë një leje kalimi për kancelaritë europiane. Pra është përdorur raporti me Beogradin, dhe raporti i tij me Vucic për të pasur më shumë akses në vizitat perëndimore. Është i gatshëm t’i përgjigjet ftesave të ndryshme. Do doja dy gjëra të ndryshonin në axhendën e Ramës: së pari / ka qenë një traditë e pashpallur e politikës shqiptare, që shumica e krerëve të shtetit sa herë kanë marrë takime në kryeqytete të tilla kanë bërë konsultime paraprake informale me liderët e Kosovës dhe ndonjëherë edhe me opozitën kur bëhet fjalë për qëndrime; së dyti / do preferoja që vizita të marrë karakter tjetër, psh që kryeministri të shkojë të vizitojë edhe katedrën e gjuhës shqipe për të parë numrin e intelektualëve që kemi atje, të interesohet për biznesin shqiptar atje se sa për ta shfrytëzuar takimin për të provomuar librin e tij që në raportet mes vendeve nuk ka pikë rëndësie. Shumë vite më vonë do ta kuptojmë që ka qenë humbje kohe.

Batutat në efektin e show-t dhe thjeshtë për efekt mediatik. Kjo ka ndodhur jo vetëm në Serbi por edhe Gjermani, dhe është quajtur dhe flirt me kryeministrave…

Krasniqi: Unë e shoh si një dallim me modelit të politikanit që prodhohet në Ballkan, përfshi dhe modelin shqiptar, me modelin e një politikani normal perëndimor. Kur Merkel thotë që kryeministrat e vendeve të njohura bëjnë vizita asnjëherë nuk bëjnë batuta, janë seriozë, kanë një dosje me problematika dhe serioziteti duket tek aftësia për të mbrojtur interesat e vendit të tij. Kurse në Ballkan ngaqë nuk kanë projekte konkrete e mbushin me batuta se dhe shoqëritë nuk janë aq të kulturuara për ta kuptuar thelbin e problemeve të tilla dhe më shumë këto takime bëhen jo për të zgjidhur problemet por për t’i treguar perëndimit që ne po merremi vesh dhe tani meritojmë më shumë fonde. Është lëvizje që në aspekt afatgjatë nuk sjell zhvillim. Është koha që zoti Rama të dalë nga ai kostumi i artistit tek një zyrtar që paguhet nga taksat e popullit shqiptar dhe në këtë mënyrë të mbrojë interesat e shtetit në raport me vendet e tjera.

Kur flisni kështu për z.Rama i referoheni dhe Vucic? Pra, ka edhe ai këtë mënyrë të bërit politikë?

Krasniqi: Vucic, vetë nismën për organizimin e këtij takimi e ka në funksion të politikës së ditës. Fakti që mblodhi politikanë nga rajoni dhe perëndimi, ai arriti atë që donte të merrte nga prania e tyre. Është konsumator i rregullt i imazhit. Edhe nga fati i tij që nuk ka rival të fortë politik për shkak se pala tjetër është shumë më nacionaliste. Unë nuk do doja që në mediat e Tiranës dhe Prishtinës, batutat të ishin lajm kryesor, por rezultatet konkrete që ky takim solli. I vetmi rezultat konkret që unë pashë ishte një diskutim 20 minutësh me përfaqëusit e Preshevës. U fol për diplomat dhe problemet e pazgjidhura. Por duhet të ketë më shumë përfaqëues për organizimin e nismave të tilla. Pse mos jemi ne organizatorë të nismave të tilla, pse të mos jetë Shqipëria? Pse të jemi garniturë e nismave rajonale?