Agim Hushi: Jam me Blushin dhe dua Nanon

Tenori i njohur, Agim Hushi përflitet se i është bashkuar nismës së deputetit socialist, Ben Blushit. Hushi është figura e parë publike që i bashkohet partisë së re të Blushit dhe deputetes tjetër, Mimoza Hafizit.

Por, akoma më interesant është reagimi i Hushit disa orë përpara se ky lajm të bëhej i ditur. Ai ka postuar një foto me ish-kryeministrin, Fatos Nano, duke rikthyer bashkëpunimin dhe ofertën e bërë për të vite më parë.

Agim Hushi shprehet se në vitin 2005, Nano i ka ofruar postin e Ministrisë së Kulturës, ndërsa e konsideron ish-kryetarin e PS-së si një politikan të kalibrit të madh.

“Fatos Nano! Kryeministri dhe Lideri Historik i PS. Politikani liberal dhe inteligjent, njeriu që afroi dhe mblodhi rreth vetes njerëz të zot e të ditur, ashtu siç iu dha shance të barabarta gati të gjithëve, përfshi këtu dhe politikanëve që ishin dhe janë akoma edhe sot, në majë të pushtetit. Kujtoj me mirënjohje elegancën dhe fisnikërinë e fjalëve të tij, kur më ftoi të bashkëpunoja për 4 vite me të, duke nënkuptuar portofolin e Ministrisë së Kulturës, më 2005. Fatos Nano mbetet padyshim modeli i lojtarit politik të kalibrit të madh, mbi të gjitha i respektimit të rregullave të lojës dhe të kundërshtarit. Historia do ta gjykoj atë në kompleksitetin e tij dhe të kohës në të cilin ai udhëhoqi Shqipërinë. Por unë jam i bindur se pesha e tij është një garanci e themeleve të shtetit të ri pluralist shqiptar, me të mirat dhe të metat e tij, por padyshim si një person që e diti mire se pas do t’i vinte historia”, shprehet tenori.

Agim Hushi kandidoi pak javë më parë për postin e Drejtorit të Teatrit të Operas dhe Baletit pas dorëheqjes së Ilir Kernit.