Ai vrau tre vajzat e tij në gjumë, nëna: Ja pse e pranova përsëri në shtëpi

Për 32 vite me radhë ka jetuar në krah të vrasësit të vajzave të saj, i cili ishte edhe bashkëshorti i saj e babai i vajzave në të njëjtën kohë. Italiania Valeria Dal Sasso ka shpjeguar vetëm pak ditë më parë se përse ka bërë këtë zgjedhje në jetën e saj dhe pse e fali të shoqin për veprimin e tmerrshëm që kishte kryer.
Gjithçka kishte nisur mëngjesin e 7 marsit të vitit 1984, kur ish zyrtari i marinës, Vittorio Visentin, i cili vetëm disa javë më parë ndërroi jetë, vrau tre vajzat e tij në moshë të re, duke i goditur me çekiç, hekur e tulla.

“Unë kam dashur gjithmonë që Vittorio të ishte mirë… dhe ky ishte vendi i tij, pranë meje”, – shpjegon gruaja, e cila e pranoi të shoqin sërish në shtëpi, edhe pas vrasjes së vajzave të tyre të mitura.

“Tani as nuk e mbaj mend mirë se kur u kthye në shtëpi për së dyti herë tek mua. Ndoshta tre apo katër vite pas asaj që ndodhi (vrasjes së vajzave). Për mua nuk ishte aspak e vështirë t’i hapja sërish dyert e shtëpisë dhe ta mirëprisja. Kemi folur shumë për atë që ndodhi. Kujtimet tona të përbashkëta na bashkonin edhe më shumë. Jetuam përherë me shpresën se një ditë do të mund të takoheshim sërish me vajzat tona”, – ka thënë ndër të tjera për mediat italiane gruaja.

Çdo gjë nisi në agimin e datës 7 mars të vitit 1984, kur pa u gdhirë mirë, Vittorio fillimisht plagosi rëndë të shoqen dhe më pas tre vajzat e tij, ku më e madhja ishte 8-vjeçe. Pa vajtur ora 7 ai kishte ndërruar rrobat e lyera me gjak dhe ishte larguar nga shtëpia për t’u arratisur në mes të Italisë. Ai u kap disa ditë më pas nga policia ndërsa në xhep iu gjet një gazetë ku shkruhej për ngjarjen e rëndë dhe vrasjen e tre fishtë.

Burri ishte në gjendje të rënduar psikologjike në momentin që u kap nga policia, ndërsa pranoi se kishte kryer vrasjen e tre vajzave të cilat i donte shumë. “Ishin në vështirësi të mëdha. Nuk doja që vajzat e mia të vuanin akoma më shumë. I doja shumë”, – ka thënë ai në atë kohë, ndërsa gjendja e tij psikologjike ishte tejet e trazuar.

Gruaja e Vittorios, Valeria, pas një muaji që u zgjua nga gjendja e komas në të cilën ra për shkak të goditjeve të forta nga i shoqi, tha se e kishte falur për çdo gjë që kishte bërë dhe se ajo do të kujdesej gjithmonë për burrin e saj.

Vittorio nuk mori dënim me burgim të përjetshëm pasi veprimet e tij ishin kryer në një gjendje të rënduar psikologjike, por u dënua me disa vite burg, për shkak se cilësohej si person me rrezikshmëri, për shkak të asaj që kishte kryer. Pas daljes nga burgu ai u kthye sërish në shtëpi tek bashkëshortja e tij, Valeria, nën kujdesin e së cilës arriti të rehabilitohej./Jetaoshqef/