Aksident në Padova, gjyshi shqiptar ‘hero’ shpëton mbesën por përplaset për vdekje nga makina

Një histori rrëqethëse, që mban brenda gjestin heroik të një gjyshi. 78-vjeçari shqiptar Novrus Hasa kishte dalë shëtitje mbrëmjen e djeshme në Villanova, në Padova me mbesën e tij 22 muajshe kur rreth orës 19:45 është përplasur nga një automjet ndërsa po kalonte rrugën në vijat e bardha.

Vogëlushja ishte e ulur në karrocë dhe me sa duket 78-vjeçari Hasa që ishte rezident në sheshin “Mariutto” e ka shtyrë për ta shpëtuar, duke gjetur vetë vdekjen. Foshnja ka shpëtuar me disa fraktura dhe është jashtë rrezikut në spital. Dëshmitarët kanë thënë se gjyshi sapo ka parë dritat e makinës e ka shtyrë fort karrocën duke e shpëtuar kështu.

Menjëherë ne vendin e ngjarjes kanë shkuar forcat e policisë dhe një helikopter i ndihmës së shpejtë. Pavarësisht tentativës së mjekëve për ta reanimuar, i moshuari nuk ka mundur të mbijetojë.

Ndërkaq mediat italiane raportojnë se autori i aksidentit ndodhet në gjendje shoku. Ai është një 29-vjeçar nga Milano që drejtonte një Volkswagen Polo, gjithashtu i transportuar në urgjencë në Padova, ndërsa do të përgjigjet për aksidentin që i mori jetën 78-vjeçarit shqiptar.