Aksident tragjik në Itali, nëna shqiptare vdes në sy të tre fëmijëve

Një grua shqiptare ka gjetur vdekjen si pasojë e një aksidenti të ndodhur mbrëmjen e djeshme në Ferrara të Italisë.

Sipas mediave italiane 37 vjeçarja shqiptare B.A., nënë e tre fëmijëve dy djemve 16 dhe 13 vjeç si dhe më të voglit 2 vjeç është përplasur me një makinë teksa udhëtonte me mjetin e saj “Alfa Romeo 156”.

Sipas policisë nëna shqiptare duket se ka humbur kontrollin e mjetit dhe ka devijuar në korsinë tjetër, duke u përplasur me një makinë, ku udhëtonin një familje marokene. Shkak dyshohet të jetë bërë moti i keq dhe lagështira e madhe në rrugë.

Gruaja vdiq në vend, në sy të tre fëmijëve të saj të cilët udhëtonin si pasagjer. Ata mbetën të plagosur, njëri prej tyre më rëndë se të dy të tjerët. Në atë moment, në vend ka mbërritur burri i viktimës, i cili ka pësuar gjendje shoku kur ka parë gruan në timon pa shenja jete, kurse ambulancën që merrte me barrelë njërin prej fëmijëve.

I është turrur nga pas me vrap dhe i ka bërë thirrje të ndalonte, por ambulanca u largua, duke e lënë burrin në dhimbjen e madhe. Policia e cila ndodhej në vendngjarje ka nisur hetimet për zbardhjen e plotë të shkaqeve të aksidentit.