Aksidentet me vdekje ‘janë ulur në mënyrë drastike’ nga ligji i ri për trafikun

Drejtor i Drejtorisë për Preventivë dhe Siguri në Komunikacion në Policinë e Kosovës, Jeton Rexhepi, ka thënë se Ligji i ri për trafikun sanksionon ashpër shkelësit e tij.

“Ju njoftoj të gjithë qytetarëve, këmbësorëve dhe vozitësve se dënimet janë mjaft të ashpra. Futja me automjet në semafor kur është ngjyra e kuqe – konfiskohet në mënyrë automatike prej 6 muaj deri një vit patentë shoferi dhe gjobitesh me qindra euro”, ka thënë ai në “Puls” të KTV’së.

Ai ka theksuar se edhe ngasja e shpejtë dhe tejkalimi i automjetit aty ku ndalohet tejkalimi, sanksionohet mjaft ashpër “me marrje të patentë shoferit e deri tek gjobitja me shuma të mëdha të parave”.

“Ju bëj me dije se Policia e trafikut është mobilizuar mjaft në rrugët e Kosovës. Me radar po kontrollon, po gjobit të gjithë shkelësit e ligjit. Duhet të respektoni rregullat e trafikut, përndryshe do të mbeteni pa patentë shofer dhe do paguani gjoba marramendëse”, potencoi Rexhepi.

Prej futjes në fuqi të ligjit të ri e deri më sot, Rexhepi tha se “janë ulur në mënyrë drastike aksidentet me vdekje në trafik”.