Alket Rizai lirohet për 1 vit e gjysëm nga burgu në Greqi

Gjykata greke dënoi me 10 vite e 8 muaj burg shqiptarin Alket Rizai dhe dy bashkëpunëtorët e tij, si dhe heqjen e të drejtave politike për të zgjedhur dhe për t’u zgjedhur për 5 vite.

Ai u transferua nën masa shumë të forta sigurie nga burgu i Malandrinos në Greqi për në Gjykatën e Apelit në Lamia.

Të pandehurit shqiptarë akuzohen se më 17 mars të vitit 2013 mbajtën peng 5 zyrtarë të burgut në Greqi, me qëllim që të arratiseshin nga qelia. Për këtë veprim, ata pranuan fajin në Gjykatë dhe kërkuan falje në seancën e sotme, ndërsa më herët ishte provuar se granatat dhe eksplozivët që kërcënonin 3 vite më parë, ishin false.

Në gjyqin që u zhvillua mesditën e sotme, Rizai pohoi para trupës gjykuese se nuk kishin ndërmend që të plagosnin apo vrisnin punonjësit e burgut që morën peng, shkruan Syri.net.

“Të gjithë të burgosurit kanë të drejtën e lirisë, mjafton që mos t’u bëjnë dëm të tjerëve”, tha shqiptari, ndaj të cilit rëndojnë disa akuza. Rizai pohoi gjithashtu se kur ndodhi pengmarrja në 2013, ishte nën efektin e drogës, pasi ishte hera e parë që konsumonte.

I pyetur nga prokurori përse ndodhej në burg në të kaluarën, ai tha se ishte burgosur gabimisht dhe vazhdoi: “Kjo është arsyeja pse u arratisa me helikopter”.

Por, pavarësisht mbrojtjes së tij, Gjykata vendosi t’i dënonte me 10.8 vite burg në tërësi tre të pandehurit. Megjithatë, Rizai nuk dukej shumë i shqetësuar, pasi për 1 vit e gjysëm përmbushet koha e qëndrimit në burg gjatë viteve që është zhvilluar kaluari gjyqësor, pra deri ditën e sotme kur u dha vendimi.

Pra, sipas ligjit grek, llogaritet që për 1 vit e gjysëm Alket Rizai përfundon dënimin dhe del nga burgu.
“Nuk jam as shenjtor, as djall. Nëse më dënoni nëse jo, për 1 vit e gjysmë do të jem i lirë”, ka thënë Rizai në gjyq.

Shqiptari Alket Rizai është i njohur për opinionin publik pasi ka tentuar dy herë të arratiset nga burgjet greke, një herë me helikopter së bashku me kriminelin grek Vasilis Palaiokostas duke u larguar në mënyrë spektakolare, por u kap sërish disa ditë më vonë. /SYRI.net/