ANALIZA/ “Pse Shqipëria e ka shënuar tashmë golin ndaj Spanjës”

Gazetari sportiv Gëzim Sinemati, në një opinion për “Panorama Sport” para ndeshjes me Spanjën, tregon bindjen që ka se kuqezinjtë do të kenë probleme përballë iberikëve. Por njëkohësisht, ai tregon se si Shqipëria ka marrë një fitore të vogël pa nisur mirë kjo ndeshje…

Shqipëria ia paska bërë golin Spanjës…

Ajo që ka ndodhur në ndeshjen Itali-Spanjë, mu në zemër të pjesës së parë, meriton të kategorizohet te filmat “horror” të futbollit. Italianët vraponin të dëshpëruar, në kërkim të topit, ndërsa spanjollët, me stilin elegant, imponues deri në despotizëm, lodronin me një stil shpërfillës.

Një skenë e pabesueshme, sidomos për ata që besonin se Italia e sotme ka rritur ndjeshëm flirtin me topin. Sipas kësaj logjike, fjalët e futbollistit të Napolit, Kajehon, në adresë të shokut të tij, Hysaj, në prag të ndeshjes Shqipëri-Spanjë, janë për të qeshur, por nxisin edhe frikë: “Merrni edhe një top tjetër, sepse atë të lojës… do ta zaptojnë ata”.

Sigurisht, ekipi i De Biazit e di fort mirë se nuk do të jetë si me Lihtenshtejnin, në një 90- minutësh ku fituam pikët, por humbëm fytyrën “europiane” të lojës. Nga dehja që shkakton klasifikimi i përkohshëm, ku Spanja dhe Italia mbajnë mbi shpinë Shqipërinë, sikur nuk na bën zemra të ringjallim pyetjen fantazmë, atë që na ka ndjekur për 90 minuta: cili ishte dallimi nga Lihtenshtejni?

Kur luanim Europianin, nuk na dukej vetja si humbës me Zvicrën dhe Francën, ngaqë ngrinim lart flamurin e vlerës së lojës. Tani, sikur të kemi harruar sjelljen “franceze” të Kombëtares, festojmë 3 pikët me Lihtenshtejnin, duke injoruar thelbin. Ka një teori, tepër ngushëlluese, se nuk mund të zbukurohesh shumë para ndeshjes me Spanjën, ngaqë iberikët ta thyejnë pasqyrën.

Kur të jemi përballë Iniestës me shokë, artizanëve të topit, ata që sunduan botën e futbollit më ëmbëlsi dhe jo me forcë, kemi një thes me arsye për t’u merakosur për atë që mund të ngjasë në mesfushë. Kur ke kurajën dhe pranon se me Lihtenshtejnin, 3 ditë më parë, nuk u shfaqëm të shëndetshëm në mesfushë, cili do të ishte fati i këtij reparti jetësor, kur do të përballemi në fushë me “xhuxhat lodrues”?

Ata që tregojnë respekt për kundërshtarin kur thonë se “Shqipëria do të jetë një kundërshtar i vështirë”, por frikën më të madhe e kanë pasur gjetiu. Kanë protestuar në UEFA me anë të një shkrese: Si mund të pranohet të luajë Kosova me Kroacinë, në stadiumin e Shkodrës, kur disa ditë më pas do të ndeshet Shqipëri-Spanjë?

E dini çfarë kanë aluduar mediat e tyre? Se Shqipëria ua ka kërkuar këtë nder shefave euriopianë, që “vëllezërit” të luajnë njëri pas tjetrit, në ditët e bekuara kur do të zgjidhej shefi i ri i UEFA-s, Ceferin. Në qoftë e vërtetë, “golin” ua paskemi bërë kampionëve, sepse ata janë shumë fanatikë pas gjatësisë së fijes së barit, pale t’i cenosh tapetin, ku niveli i tij përcakton dhe shkallën e magjisë së tyre.