Anija minakërkuese franceze ‘Lyre’ mbërrin në portin e Durrësit

Anija minakërkuese franceze “Lyre” ka mbërritur në portin e Durrësit në vizitën katërditore ku pritet të nisë stërvitjen e përbashkët me marinën shqiptare në operacionet e zhytjes dhe kërkimit të minave detare.

Në ditën e dytë të qëndrimit në portin e Durrësit anija është vënë në dispozicon të medias për një vizitë njohëse të saj. Kapitenia e anijes, Anne Sophie Borrad e cila e drejton minakërkuesen “Lyre” që nga fillimi i këtij viti, është shprehur se qëllimi i vizitës në Shqipëri është përmirësimi i marrëdhënieve dypalëshe me ushtrinë shqiptare për një stërvitje katërditore për zbulime në thellësi të ndryshme të detit bashkë me zhytësit e marinës shqiptare.

Anija ushtarake franceze Lyre, njofton portali durreslajme, ka një gjatësi prej 50 metrash dhe është e specializuar për të kryer ndërhyrje nënujore dhe cminime. Ajo është e pajisur me sonar, robotikë nënujore dhe një ekip zhytësish për cminime që mund të kryhen deri në 120 metër thellësi. Anne Sophie Borrad, është kapitenia e parë femër e një anije minakërkuese detare, dhe një prej 10 kapiteneve femra të ushrisë franceze.