Arrestohet babai, dëshmia: Preka vajzën, mendova se ishte gruaja

Policia e Fierit arrestoi dje babain e akuzuar për ngacmimin seksual të vajzës së tij 14-vjeçare.

Pasi e shpalli në kërkim një ditë më parë, dje blutë arrestuan shtetasin Altin Xhafa. 45-vjeçari ka theksuar gjatë marrjes në pyetje se kishte gati një vit që ishte ndarë nga e shoqja dhe vajzën e mbante e ëma.

Deklarata e tij ka qenë tronditëse edhe për hetimorët, pasi ai e ka pranuar ngacmimin, por sipas tij, ka qenë aksidental.

Sipas burimeve të Policisë, babai i të miturës ka pranuar se në një nga ditët në periudhën para një viti, kur ai ka qenë duke fjetur në kuzhinë, pranë tij ishte shtrirë e bija.

Teksa ishte në gjum dhe duke menduar se personi që ishte shtrirë pranë tij ishte bashkëshortja, ai ka pohuar se e ka prekur me dorë vajzën në organin gjenital.

Por pasi ka kuptuar që ajo nuk kishte qenë e shoqja, e ka shtytur vajzën me duar dhe i ka bërtitur që të mos i shtrihej më afër në të njëjtin divan kur ai ishte në gjumë./PANORAMA