Arrestohet pas 3 muajsh në arrati, njëri nga grabitësit e bankës në Vlorë

VLORE – Tre muaj pas grabitjes së bankës BKT në Vlorë, policia ka vënë në pranga një 26-vjeçar, i cili ishte shpallur në kërkim, si i dyshuar për ngjarjen.

Mësohet se në pranga ka rënë 26-vjeçari Lorenc Gjini, 26 vjeç, banues në Vlorë, i cili dyshohet të jetë një nga bashkëpunëtorët e grabitjes së bankës, më 11 korrik 2016.

Deri tani, Policia e Vlorës ka arrestuar dy nga autorët e dyshuar në lidhje me këtë ngjarje. Ndërkohë vijojnë hetimet për zbulimin dhe kapjen e autorëve të tjerë bashkëpunëtorë.

Filiali i bankës BKT në Vlorë u grabit më 11 korrik rreth orës 14:00. Dy persona me kapele me strehë kanë hyrë si qytetarë në bankë dhe nën kërcënimin e armëve iu kanë kërkuar arkëtareve t’iu jepnin lekët. Pasi kanë marrë 2 qese me para grabitësit janë larguar me shpejtësi në rrugicat pas bankës që ndodhet në qendër të qytetit.