Arrestohet rastësisht bosi shqiptar i drogës në Itali. Ja emri

Policia italiane ka vënë në pranga 40-vjeçarin shqiptar Besnik Delaj në qytetin e Foxhias, pasi u ndalua në drejtim të një automjeti tip BMË dhe iu gjet një pistoletë me numër serie të fshirë, me 12 plumba dhe gati për të qëlluar.

Patrulla e policisë e ndaloi për një kontroll rutinë dokumentesh dhe pasi pa shenja nervozizmi vendosi të bënte një kontroll të automjetit.

Bashkë me shqiptarin ishte edhe një minorene rumune. Përveç armës, policia gjeti edhe 10 fishekë të tjerë, si edhe një sasi të vogël marijuanë.

Besnik Delaj është një emër i njohur për autoritetet italiane. Në korrik të vitit 2013, ai u arrestua sërish në Foxhia, në një operacion të rëndësishëm, ku u shkatërrua një organizatë ndërkombëtare e trafikut të drogës dhe u sekuestruan 17 kg heroinë dhe 3 kg kokainë.

Asokohe, Delaj dyshohej se drejtonte degën e grupit kriminal në rajonin e Puljas.