Artan Hoxha paralajmëron ‘bombën’: Prova për viktimën e fundit të narkotrafikut, ish-ushtarakun e FA-ve

Gazetari Artan Hoxha dhe grupi i xhirimit të News24 kanë udhëtuar drejt periferisë së kryeqytetit, në fshatrat që ndodhen në kufi mes qarkut të Tiranës dhe Elbasanit për të zbardhur të vërtetat e një krimi të pak ditëve më parë.

Ka qenë vetë gazetari Hoxha që ka paralajmëruar se do të publikojë prova dhe fakte për viktimën e fundit të narkotrafikut që thotë se ishte një ish-ushtarak.

“Në skenën e krimit për të sjellë prova dhe fakte për viktimën e fundit të narkotrafikut. Një udhëtim aventure prej 12 orësh në zemër të xhunglës së trafikantëve të kanabisit në zonën malore që kufizon malësinë e Tiranës dhe Malësinë e Elbasanit. Është një nga ato investigime që nuk duhet ta humbni, jo për të mësuar si u ekzekutua një ish-profesionist i Forcave të Armatosura, por për të kuptuar se çfarë kohe po jetojmë….Nga ora 16.30 live si gjithmonë, në NEWS 24”, shkruan Hoxha.

Trupi i pajetë i 36-vjeçarit Besnik Pudja u gjet mesditën e 7 tetorit në një stan në fshatin Kollogjesh, të Komunës Shën-Gjergj dhe një armë tip pistoletë afër trupit.

“Alarmi është dhënë nga një telefonate në sallën operative, tek numri i emergjencave 112, ndërsa me të shkuar në vendngjarje policia ka konstatuar trupin e pajetë të shtetasit 36-vjeçarir, banues në Shkozë. paraprakisht dyshohet që 36-vjeçari të jetë vetëvrarë”, deklaroi atë ditë policia.