Banda e Shullazit mori 1 mln euro nga biznesmeni dhe 30 për qind të aksioneve

Zbardhen të tjera detaje nga arrestimi për gjobëvënie ndaj biznesmenit të ndërtimit, i nipit dhe shokut të Emiljano Shullazit, Endrit Zela dhe Endrit Qyqja. “Gazeta Shqiptare” shkruan se Shullazi ka shkuar të firmosë një kontratë shërbimi me biznesmenin e dëmtuar, ku i ka ofruar shërbime administrative dhe në këmbim të kësaj do të merrte 20% të biznesit.

Por gjërat nuk kanë funksionuar kështu. Pasi më vonë, personi në hetim, Emiljano Shullazi ka ndërruar mendje dhe nëpërmjet kanosjes, dhunës verbale dhe fizike i ka kërkuar biznesmenit që vlera e pasurisë që do i kalonte, nuk do ishte më në vlerën 20 për qind por 30 për qind.

Nën kërcënimin e armës, biznesmeni është detyruar të nënshkruajë para noterit kontratën e dhurimit në vlerën 30 për qind. Gjatë gjithë bisedave të bëra i pranishëm ka qenë edhe personi tjetër në hetim, Gilmando Dani, i cili ka qenë në dijeni të të gjitha bisedave të bëra dhe veprimeve të kryera mes Emiljano Shullazit dhe biznesmenit.

Nga ana tjetër, në të gjitha rastet e zhvillimit të takimeve të biznesmenit me personin në hetim Emiljano Shullazi, ky i fundit ka qenë i shoqëruar me disa persona të cilët lëviznin me disa makina. Edhe në momentin e përpilimit të kontratës së dhurimit, Emiljano Shullazi ka ketë qenë i shoqëruar me shumë persona, të cilët ruanin vendin përreth. Edhe prania e këtyre personave të tjerë ka ndikuar në krijimin e një situate të posaçme për kërcënim ndaj biznesmenit.

Gjoba 1 milionë euro

Në bazë të veprimeve hetimore ka rezultuar se Shullazi dhe Dani dyshohet se i kanë marrë një biznesmeni shuma parash në kohë të ndryshme, duke e kërcënuar fizikisht si dhe duke ushtruar dhunë fizike. Sipas hetuesve të çështjes, vlera e gjobës arrin në shumën e 1 milion eurove.

Në disa nga rastet e kërcënimit për dhënie pasurie, në shoqërinë e Shullazit dhe Danit kanë qenë edhe Endrit Qyqja dhe Endrit Zela. Po në bazë të veprimeve hetimore, rezulton se Qyqja dhe Zela kanë qenë të pranishëm në disa momente kur Emiljano Shullazi ka bërë kërkimin e padrejtë të sasisë monetare. Gjithashtu, këta persona kanë përfituar shuma në lekë të lëvruara me çek nga ana e biznesmenit të dëmtuar, në favor të tyre, me porosi të Emiljano Shullazit.

Takimi ‘në burg’
Ndërkaq, burime konfidenciale për gazetën kanë dhënë se Shullazi ka shkuar te salla ku bëhen takimet, por nuk e ka gjetur aty nipin e tij, sepse Zela ishte arrestuar nga uniformat blu. Punonjësit e burgut nuk i kanë treguar atij se nipin ia morën me pranga në duar, por i kanë thënë vetëm se takimi nuk do të kryhej./GSH