Basha: Kush është Donald Lu që më tregon detyrat?

Partia Demokratike çoi sot në Kushtetuese ligjin për Vetingun ndërsa deklaroi se nesër do të votojë në Parlament strukturën e posaçme antikorrupsion, SPAK. Në një dalje për mediat, Basha u nervozua kur u pyet nga gazetarët se ambasdori Lu e ka kritukuar vendimin për dërgimin e Vetingut në Kushtetuese. “Nuk ka nevojë të mi citoni sepse nuk pres nga asnjë ambasador të më tregojë cila është detyra kushtetuese e PD, e opozitës apo e imja si qytetar. Ambasadorët kanë detyrën e tyre, unë kam detyrën time dhe e kam kryer me ndërgjegje të plotë”, u shpreh Basha.

Ndërsa duke folur për SPAK, Basha tha se “nëse ligji miratohet nesër Rama, Ilir Beqaj, Arben Ahmetaj dhe shpura e të korruptuarve do të jenë në makth”.

“Ligji i SPAK, – tha ai, – i zgjidh duart atyre punonjëve me integritet që të vazhdojnë hetimet për ata zyrtarë që zhdukin paratë e subvencioneve”.

“Edhe javët e fundit, Tahiri dhe Rama bënë gjithçka që kësaj strukture të veçantë t’i vendosnin mbi kokë figura politike që sot zaptojnë zyrat e shtetit, siç janë të dërguarit e Ramës në Drejtorinë e Pastrimit të Parave apo atë të dokumentacionit të klasifikuar, por në fakt, pas këmbëguljes tonë të gjitha këto kanë rënë dhe ligji nesër është në parametrat e kërkuar”, u shpreh kryedemokrati Basha.