Basha: Nuk ka pasur në 26 vjet, nisje më të trishtë të universitetit sesa sot

“Nuk ka pasur në këto 26 vite, nisje më të trishtë të universitetit sesa sot,” ka deklaruar sot Kryetari i PD-së, Lulzim Basha.

“I lanë bosh gjysmën e auditorëve, për shkak të politikës armiqësore me maturantët, – thotë Basha në një shënim të tijin në Fb. – Gjysma e këtyre 18 – vjeçarëve ëndërrimtarë e idealistë, janë rrugëve, ende pa përgjigje, në pritje të tepricave që do lërë reforma e Edi Ramës.

Po para kësaj, ata e të gjithë maturantët e vendit, kaluan 2 muaj ferri, sepse nuk ishin në dorën e meritës e aftësive, mundit e djersës, por nën masën arbitrare, skandaloze të Edi Ramës, i cili ndryshoi papritur rregullat e lojës.

Dekani i Ekonomikut në UT thotë se maturantët më të mirë kanë bërë zgjedhje nën presion: Ose tek privati, ose në degë jo me emër, nga dëshpërimi për të mos humbur krejtësisht 3 vitet e Maturës.

Dramë e madhe! S’ka si quhet ndryshe kjo e Edi Ramës, që vazhdon ta pompojë si sukses,” përfundon Basha.