Basha pranon edhe idetë ndryshe: Bashkim të të gjithë faktorëve kundër Edi Ramës

TIRANË- “Bashkim të të gjithë faktorëve të bazës pavarësisht diversitetit të mendimit që është pjesë, aset, pasuri e demokratëve”. Kjo ka qenë thirrja e kryedemokratit Lulzim Basha gjatë një takimi me bazën në Paskuqan. Basha tha se ‘kushdo në këtë familje politike që kërkon të japë kontributin e tij apo të saj në këtë përballje me këtë të keqe të madhe që ka kapur Paskuqanin dhe Shqipërinë prej fyti dhe që ka fytyrën, zërin, formën dhe bëmat e Edi Ramës nuk mund dhe nuk duhet të mungojë në këtë bashkim’.

“Hapja për të përfshirë në familjen politike këdo që dëshiron të jetë pjesë e kësaj beteje dhe që ndan me ne të gjitha vlerat tona si demokratë. Për këtë e kam fjalën kur flas për hapjen. Flas për hapjen e dyerve të shtëpisë tonë, të familjes tonë. Ndryshe nga hapja që ka dalë në shtëpinë tonë, aleanca është një mekanizëm politik. Një mekanizëm politik i cili kërkon nga unë në radhë të parë dhe nga gjithsecili prej nesh të realizojmë domosdoshmërinë e bashkimit të çdo faktori politik dhe jo politik me familjen tonë politike në këtë betejë”, deklaroi Basha.

Ai akuzoi kryeministrin Rama se ka bashkuar kriminelët, ndërsa si opozitë ftoi të bashkohen të gjithë ata që refuzojn% krimin, drogën, shit-blerjen e votës dhe asgjësimin e zgjedhjeve të lira.

“Në qoftë se Edi Rama ka paudhësi të bashkojë kriminelët më në zë rreth tavolinës së tij, atëherë si mund të kemi në skrupuj të bashkojmë në një aleancë sa më të madhe këdo që refuzon krimin, këdo që refuzon inkriminim, këdo që refuzon drogën, këdo që refuzon shit-blerjen e votës dhe asgjësimin e procesit politik, asgjësimin e zgjedhjeve të lira dhe të ndershme”, tha Basha nga Paskuqani.