BATUTAT NË KUVEND/ Noka: Jepini një rrotë sallami të mbyllë gojën. Rama: Flamur po i bie nga mbrapa

TIRANE – Teksa argumentonte nga foltorja e Kuvendit cilësinë dhe garancinë që sipas tij, ka sistemi i ri i pranimit në universitete, kryeministri Edi Rama u ndërpre disa herë nga deputeti demokrat Flamur Noka.

Shefi i qeverisë ka ironizuar Nokën, duke i thënë se bën më mirë të flasë për kanabisin, sepse arsimi është një çështje që nuk ka lidhje me të.

“Flamur mos u merr me ndërhyrjet e.. Flamur ti detyrën e ke të tundesh mbi kanabis, s’ke lidhje ti me sistemin universitar kështu që vazhdo tund flamurin, valëvitu mbi kanabis, se meqë ma the se s’ishe prezent po të them ata që do mbeten me kuota të paplotësuara do jenë pikërisht privatët. Valëvitu mbi kanabis, mos u merr me çështje të tjera se as ti kanë ngarkuar ty as nuk i mban dot, tundu mbi kanabis dhe e vetmja gjë që mund të bësh është që kuotat e universiteteve përktheji në tonelata kanabis dhe kujdes se po ju shtohen njerëzit që do hanë përsheshin tuaj dhe luftoni fort për të ngrënë me lugën e Saliut se s’ka lugë për të gjithë ai”- deklaroi Rama.

Më pas debati degjeneroi në përdorimin e fjalëve me nënkuptim banal.
“E mirëkuptoj kryeministrin për fjalën përshesh dhe kazan se i ka mbetur refleks nga koha e Parisit kur hante përshesh në kazan. Katër nxënëse në Fushë Krujë u transportuan në spital. Ky kryeministër në vend që të mos shqetësoheni shumë me përshesh, me kazan jepini një rrotë sallami të mbyllë gojën.”- deklaroi Noka. Por në replikën e tij Rama i tha se “Flamur po i bie nga mbrapa, ndaj unë e nis fjalën gjithmonë me ty”.

Duke vijuar replikën me Nokën, Rama u shpreh se çdo të enjte PD-ja jo vetëm shpif por edhe fabrikon shpifje, siç ishte sipas tij, rasti i nxënësve të helmuar në shkollën 9-vjeçare në Paskuqan.
“E çove ti Saliun se ti je ai i terrenit dhe bëtë këtu një maskaradë që një shkollë e tërë ishte helmuar nga një tym dhe ministri i tha të pritjet ekspertiza ligjore. Ish-mjeku kryeministër tha patjetër do ta presim ekspertizën, se kam respekt për ata mjekë, por informacioni që ka marrë Flamuri thotë kështu kështu…çfarë duhet të mendonin ata që kanë nerva e nge ta ndjekin këtë parlament, kur dëgjuan se një shkollë e tërë u helmua nga tymi i kanabisit të mbjellë tek oborri i shkollës? Sigurisht do mendonin o Zot në çfarë shkollash i çojmë ne fëmijët. Ekspertiza më pas vërtetoi tërësisht atë që u tha këtu nga ministri. Nuk e di çfarë mund të bëni më shumë duke abuzuar çdo të enjte, duke thënë jo gënjeshtra por shpikje dhe fabrikime kolosale”.