Berisha: Nxënësit në Paskuqan u helmuan se në klasë u dogj hashash

Rasti i 6 vajzave të shkollës 9-vjeçare “Jashar Hoxha” në Paskuqan, të cilat i janë drejtuar Qendrës Spitalore “Nënë Tereza” në Tiranë, pasi kanë patur shqetësime gjatë orës së mësimit, ka ngjallur debate në Parlament. Ish-kryeministri Sali Berisha duke lexuar atë që sipas tij i kishte dërguar prindi i njërës nga vajzat, tha se në shkollë janë djegur bimë narkotike, gjë që ka shkaktuar edhe helmim të vajzave.

“Një ngjarje dramatike ka ndodhur sot në shkollën e Paskuqanit. Ja se çfarë më shkruan në ora 13:20 prindi i një nxënëseje: “Përshëndetje zoti Berisha, jam prindi i një vajze që studion në shkollën 9-vjeçare “Jashar Hoxha” në Paskuqan dhe sot ka ndodhur një ngjarje që policia s’do ta shfaqë, por do ta fshehë si ngjarje e rrezikshme në shkollë. Kanë djegur hashash ca njerëz të paidentifikuar dhe policia s’ka bërë asnjë lëvizje për kapjen e tyre dhe e shfaq ngjarjen si helmim, dhe e shfaq këtë helmim si një ngjarje që nuk ka lidhje me djegien e hashashit”.

Policia po fsheh një krim të shëmtuar ndaj nxënësve të shkollës. Policia fshehu aktin kriminal që ndodhi ndaj prokurorit të Matit. Policia është bërë vetëm zbatuese e një direktive; djegin gjithsej 1% të kanabisit që presin, grumbullojnë për Partinë Socialiste, për llogari të PS dhe çunave të krimit 98% të të gjithë kanabisit që pritet, i cili nuk është më shumë se 3-5% të kanabisit. Po ndodh një fenomen i paimagjinueshëm. Kanabisi është bërë bimë shtetërore, bima e shtetit kanabist. Dje nuk janë zbuluar 10 ton por 22 ton kanabis, por kudo kanabisin Rama ka porositur në mënyrë të prerë që çdo rrënjë që pritet të kalojë në magazinat e partisë. Po le ta ndajmë këtë me atë që u ndodh fëmijëve pasi është një akt jashtëzakonisht i rëndë. Prindi thotë të vërtetën”, tha Berisha.

Por pas kësaj, ka reaguar ministri i Shëndetësisë, Ilir Beqaj, i cili ka mohuar këto akuza, duke shtuar se sipas repartit të Toksikologjisë në QSUT, vajzat nuk kanë patur shenja të ndonjë helmimi.

“Nuk është e vërtetë kjo që u tha këtu. Ata 6 fëmijë nuk kanë asnjë shenjë helmimi nga kjo që u tha këtu. Këtë e them si ministër i Shëndetësisë, dhe marr përgjegjësi të plotë për këtë që thashë. Shërbimi i Toksikologjisë në QSUT thotë se nuk ka shenjë helmimi nga asnjë gjë, dhe jo më helmim nga djegia e ndonjë shkurreje, apo çfarëdo bimë qoftë kjo. Parafolësi e ka zakon të flasë përçart. Dhe këtë e kanë zakon ta bëjnë me çdo lloj problemi të shqiptarëve. Keqardhje ndjej si politikan dhe qytetar, sepse ai ka qenë edhe mjek. Sa për vajzat do të them se janë në gjendje të mirë shëndetësore, dhe do të dërgohen në shtëpi”, tha ministri Beqaj.

Në replikë, ish-kryeministri Berisha tha se duhet që dalin përgjigjet e analizave për të dhënë një version të plotë të ngjarjes, duke theksuar se ministri nuk duhet të flasë pa fakte.

“Ky është shembulli tipik sesi babëzia dhe korrupsioni të verbon, të shurdhon, të nxjerr shpirtin jashtë trupi, të zhvesh nga çdo ndjenjë njerëzore. Por një ministër, qoftë edhe toksikolog nga profesioni, nuk duhet të flasë për këtë gjë kështu. Duhet të paktën të presë analizat. Nuk ka logjikë që e pranon që 6 vajza të shkojnë me urgjencë në spital, dhe të thonë nuk kanë gjë. Duhet të vijnë analizat e toksikologjisë. Po këta bëjnë atë që nuk duhet. Edhe kur një mjek tregon shenjat e shkaktuara nga kanabisi, këta shkojnë dhe e ndalojnë. Këtu është bërë e padurueshme kjo situatë”, tha Berisha.

Nga ana tjetër edhe ministri Beqaj, i ka kërkuar Berishës që të mos flasë për helmim të vajzave pa dalë përgjigjet e analizave. Por sakaq, ai iu përgjigj edhe epiteteve që ish-kryeministri përdori ndaj tij nga foltorja e Kuvendit.

“Me the edhe horr, por z.Berisha unë nuk janë as vrasës, dhe as urdhërues vrasjesh”, tha Beqaj.