Bllokohet 11 kg marijuanë në portin e Durrësit, arrestohet transportuesi

Durrës, 14 tetor 2016, NOA.al- Bllokohet në portin e Durrësit 11 kilogramë lëndë narkotike marijuanë e destinuar për në Itali.

Zbulimi i ngarkesës u bë mbrëmjen e djeshme, duke vënë në pranga transportuesin e saj Jurgen Marku 25 vjeç, banues në Tiranë.

Arrestimi i tij u bë në kushtet e flagrancës, pasi gjatë kontrollit të ushtruar në portin e Durrësit në automjetin tip Benz, Fuoristradë, me targa AA 503 OZ, në dyshemenë e mjetit, poshtë dy sedileve u gjetën dhe iu sekuestruan në cilësinë e provës materiale 18 pako të mbështjella me celofon me rreth 11 kg lëndë narkotike e dyshuar e llojit marijuanë.

I riu i cili drejtonte mjetin u prangos pas zbulimit të drogës ndërsa akuzohet për veprën penale “Trafikimi i lëndëve narkotike” e mbetur në tentativë”.