Bota e shtrembëruar e Zonjës së Parë të Sirisë

Ajo është e bukur, e arsimuar dhe e paskrupullt.

Pesë vite ka heshtur Zonja e Parë e Sirisë, Asma al-Assad, 41 vjeç.

Gjatë këtyre pesë viteve kanë vdekur më shumë se gjysmë milion njerëz në konfliktin e tmerrshëm të Sirisë.

Tani, gruaja e diktatorit thotë saktësisht: “Vdekja e çdo fëmije është një humbje për Sirinë”.

Nuk mund të ngjajë më e huaj kjo deklaratë.

Kjo për shkak se në mesin e viktimave të konfliktit janë më shumë se 50.000 fëmijë të pafajshëm, që kanë humbur jetën në mënyrën më brutale.

Mbi 100 mijë fëmijë janë të rrethuar në Alepo.

Intervistën e dha për televizionin rus, Russia24.

Ishte intervista e parë që prej shpërthimit të konfliktit në vitin 2011.

Për të shoqin Bashar Assad, 51 vjeç, me të cilin ka tre fëmijë, ajo thotë: “Ai e merr rolin e babait shumë seriozisht. Ai është një njeri shumë bujar”.

Fakt është: Bashar Assad po lufton kundër popullit të tij, për të ruajtur pushtetin. Dhe lufta është shumë mizore: ai lejon ushtrinë të përdorë municione të ngjashme me napalmin ndaj popullit të tij- viktimat janë kryesisht fëmijë.

Ajo falenderon rusët për mbështetjen e ofruar. “Situata mund të kishte qenë më e keqe pa miqtë e Sirisë”.

Fakt është: Vetëm nga sulmet ajrore të Rusisë në Siri janë vrarë mbi 10 mijë persona brenda një viti- më shumë se një e treta e tyre janë civilë. Në mesin e të vdekurve janë mbi 900 fëmijë. Kështu, “miku i vërtetë i Sirisë” po kryen një nga krimet më të mëdha të luftës të këtij shekulli.

Ajo thotë se nuk ka ndërmend të largohet nga vendi. “Po, më është ofruar që të largohem nga Siria. Por nuk duhet të jesh gjeni që të kuptosh se çfarë duan të arrijnë me këtë. Kjo nuk ka lidhje me mua apo fëmijët, por qëllimi është që të dobësohet besimi i popullit tek bashkëshorti im. Unë kam qenë nga fillimi këtu dhe nuk kam menduar të shkoj diku tjetër”.

Fakt është: Popullsia e ka humbur besimin tek presidenti. Më shumë se 5 milionë njerëz janë larguar nga Siria. Ndërkohë Assad organizon zgjedhje false, ku votohet vetëm në ato zona që janë nën kontrollin e qeverisë. Shumë qeveri të huaja nuk i shohin si legjitime këto zgjedhje.

Kush është Alma al-Assad?

Asma al-Assad, nënë e tre fëmijëve dhe ish-bankiere investimesh, lindi në vitin 1975 në Londër nga prindër sirianë. Ajo është martuar me Assad që prej 16 vitesh.

Mapo